Policey
Ordnung
Der Stadt
Bonn

[Vorwort]

Wir Joseph Clement von Gottes Gnaden Ertz-Bischoff zu Coͤllen / des Heyligen Roͤmischen Reichs durch Italien Ertz-Cantzler und Churfuͤrst / des Heyl: Aposto­lischen Stuehls zu Rom Legatus Natus, Bi­schoff zu Regenspurg und Luͤttig / Probst zu Bergtesgaden / Coadjutor zu Hildeßheimb / in Ob- und Nideren Baͤyeren / auch der Oberen Pfaltz in Westphalen zu Engeren / und Bouillon Hertzog / Pfaltz-Graff bey Rhein / Landt-Graff zu Leuchtenberg / Marg-Graff zu Franchimont, Graff zu Lohe / Horn / etc.

Thuen kundt / und hiemit zu wissen / Demnach im Jahr 1582 denen der Zeit gewesenen Buͤrgermeisteren / Scheffen / und Rath / fort Zwoͤlffteren / und gantzer Gemeinden der Statt Bonn eine Newe Policey Ordnung auffgetragen / publicirt, und zu halten anbefohlen wor­den / bey anfang aber Hochruͤhmlichster Regie­rung Weilandt: Ertz-Bischoffen / und Churfuͤrsten Ernesti in Ober- und Nideren Baͤyeren Hertzogs etc. Unseres Geliebten Vetteren Hochseligster Gedaͤchtnus / ermelte Buͤrgermeistere / Scheffen und Rath / sambt Zwoͤlffteren / und gemeiner Buͤrgerschafft deroselben underthenigst vorgebracht / dass alsolche Policey-Ordnung in verscheidenen [A2] <4> Articulen / und Puncten gegen ihre Privilegia, Altes Herkommen / und Brauch ein: und auffgerichtet / und derowegen dieselbe underthenigst gebetten / Sie uͤber alsolche ihre Privilegia, Altes Herkommen / und Gebraͤuche hinfuͤhro nit zu beschweren / sonderen vielmehr dieselbe gleichs anderen dero Vorfahren gnaͤdigst zu confirmiren / und zu bestaͤttigen / daß darauff Sie Buͤrgermeistere / Scheffen / Rath / Zwoͤlfftere / und gantze Gemeinde nit allein die also underthenigst gebettene Confirmation, und Bestettigung / vermoͤg Ihnen daruͤber außgehaͤndigten Patents, sonderen annebens auch dieses erlangt / daß ihre Beschwernuß / und bedencken uͤber mehrgedachte Policey-Ordnung durch damahligen Cantzlern / und Raͤthe angehoͤrt / und daruͤber noͤthige Relation dahin erstattet worden / daß selbe Ordnung zu erleichter- und vergnuͤgung Gemeiner Statt / und Buͤrgerschafft an verscheidenen orthen geaͤndert / gemil­dert / und gebessert / demnegst also publicirt, außgeben / und fleißig zu halten gnaͤdigst anbefohlen worden; Nachdemahlen nun aber Uns eine zeither verscheidentlich underthaͤnigst vor- und angebracht worden / was gestalten auff allsolche Policey-Ordnung dermalen in vielen Puncten nit mehr gehalten werde / sonderen dieselbe / zu Nach­theil Gemeinen Guts / und Buͤrgerschafft / in mercklichen abgang gerathen / Und dan Wir allem deme / was zu gemelter unserer Statt / und Buͤrgerschafft unbesten einiger weise gereichig / moͤglichst vorzukommen / hingegen aber / was zu deroselben Vortheil / und auffnehmen ersprießlich <5> seyn mag / fuͤrderligst vorzunehmen / gnaͤdigst geneigt / und bedacht seynt / Alß haben Wir zu fleißiger erkuͤndig- und erwegung aller deren Un: und Mißbraͤuch / so wider vielbesagte Policey-Ordnung eingeschlichen / und wie dieselbe abgeschafft / jetztgedachte Ordnung aber zur gehoͤriger Obser­vantz wider gebracht / auch was sonsten zu befuͤrderung Gemeiner Statt Nutzens / und Auffkommens der Buͤrgerschafft dabey noch ferner zu verbesseren / und zu ersetzen seyn moͤchte / einigen auß mittel Unserer Raͤthen Special Commission gnaͤdigst auffgetragen / nach deren erstatteter underthaͤnigster Relation, Wir offtbesagte Policey-Ordnung zwaren nur in einigen Puncten zu enderen / und zu verbesseren / In uͤbrigen allen aber nit weniger dan in solchen geaͤndert: und verbeßerten Stuͤcken / deroselbe feste / und ohnverbruͤchliche Observantz ernstlich / und bey vermeidung dabey einverleibt: und anderer arbitrari Strafen / zu be­fehlen noͤthig erachtet / gestalten Wir dan zu allsolchem ende selbe Ordnung nachfolgendermaßen zu publiciren / und in Druck außgehen zu laßen / auch darauff von nun an steet / faͤst / und ohnverbruͤchlich zu halten / Jedermaͤnniglich / sowohl Buͤrgermeisteren / Scheffen / und Rath / alß Zwoͤlffteren / und Gemeiner Buͤrgerschafft ernstlich gnaͤdigst anbefohlen haben / und hiemit respective nachmahlen wuͤrcklich anbefehlen. <6>

1. Von den Bürgeren der Statt Bonn / wie sie anzunehmen / und was sie g[e]loben / und schweren sollen.

Damit unser Buͤrgerlich Wesen in rechter Ehrbarkeit / bestendiger Einigkeit / und Gehorsamb erhalten / und alle Widerwertigkeit / so dasselbe verhinderen moͤchte / vermitten / und abgeschafft werde / So haben Wir auß sonderbahren uns darzu bewegenden Ursachen statuirt / und geordnet / statuiren / und ordnen hiemit wißentlich / und wollen /

Anfaͤnglich daß unser Statt Bonn mit unseren daselbst jetzigen Catholischen ehrbaren / unverleumbten Buͤrgern / und Einwohneren / und deren erzeugt und gebohrnen Kinderen Maͤnlichen und Weiblichen Geschlechts / welche in GOttes Forcht Christlichen gottseeligen Wesen zu dem Buͤrgerlichen Standt ehrbarlich erzogen / soll hinfuͤro besetzt sein / und bleiben / uns / unserem Ertz-Stifft / und nachkommen als derselben Lands-Fuͤrsten / und Oberherren allen schuldigsten Gehorsamb zu erzeigen / und unsere Statt bey unseren Vorfahren / und unser publicirter Policey-Statt-Ordnung / guten Sitten / loͤblichen Gewonheiten / und herbrachten Alten Privilegien in unserem / und unsers Ertz-Stiffts Nahmen / unser Statt befoͤrderung in ihren selbst Nuͤtzen zu behalten.

Wollen derohalben / daß vorgemelter unser Statt Bonn Buͤrgerschafft / und Gemeinde sambt / und sonders / Ertz-Stiffts / und unser Statt Bestes / Frommen / Gedeyen / und auffnehmen suchen / befoͤrderen / sich untereinander mit Buͤrgerlichen Beywohnungen zusammen thuen / in Fridlichen Standt setzen / erhalten / und / was zu ehrbahrlicher buͤrgerlicher Beywohnung / und unser Statt beßeren standts befuͤrderung rathsamb / und dienlich / vornehmen / verhalten / und sich deßen befleißigen sollen. <7>

Und daß keine von dem Frembden / oder Einkomblingen / oder einig andere / so außwendig in unseren / oder frembden Landen / Aembteren / oder Staͤtten gewohnt / zu Buͤrger oder Eingeseßenen angenohmen / gehaußet / beherberget und erhalten / oder undergeschleifft / auch Hauß / oder Kammer nit ver­guͤnstigt / verkaufft / verlehnt / oder verheuret werden sollen / es geschehe dan mit vorwissen / und zulassen unserer Buͤrgermeister / Scheffen / und Rath unser Statt Bonn / in massen wie folgt.

Nemblich daß ein jeder Burger gemelter unser Statt Bonn / welchen solche frembde Einkoͤmblinge einkehren / alßbald unserem Buͤrgermeister / und Rath unserer Statt Bonn dieselbe mit allen umbstaͤnden anzeigen / und zu erkennen geben sollen;

Darauff sollen auch Buͤrgermeister / und Rath / so baldt Ihnen anbracht / oder si e...sten² gewahr worden / solche frembde Einkoͤmblinge vor sich bescheiden / die gestalt / und gelegenheit ihres Herkommens / oder Wandels erkundigen / auch glaubhafftigen Schein von der Obrigkeit davondannen sie kommen erforderen / und erfahren / wie sie sich daselbst gehalten / abge­schieden / und herkommen seyn;

Welche aber solchen Schein alßbald nicht darthun koͤnnen / oder auch in der Zeit / so ihnen darzu benent / nicht bringen werden / oder sonst Argwohn / und boͤße Vermuthung ge­gen sich hetten / dieselbe sollen keineswegs dieser Orthen gelitten / oder geduldet werden / sonderen wohe einiger Argwohn bey oder hinter ihnen vermercket / solches soll nach befinden durch unsere Buͤrgermeister / und Ambtman angemeldet / und sie durch gemelten Ambtman zur gebuͤrlicher Straff angenommen / und unser Statt / und Landen verwiesen werden / etc.

Zu dem ordnen / und wollen Wir / daß kein Außwendiger in dieser unser Statt Bonn fuͤr einen Buͤrger angenohmen / oder auch hieher zu wohnen hinfuͤran zugelaßen / gestattet oder geduldet werden soll {sonderlich so unser Rath / und bestelter Die­ner nit ist / er habe dan zuvorhin die Buͤrgerliche Geluͤbde / Versprechnus / und Aydt gethan / und die Buͤrgerschafft oder Buͤrger-Recht auff nachfolgende Form / und Maß gebetten / erlangt / und erworben etc. <8> Nemblich soll der jenige / so in unser Statt Bonn zu wohnen / oder Buͤrger zu seyn / unseres Schutzes / Schirms / Wassers / Weide / und unser Statt Buͤrgerlicher Freyheit zu geniessen begehrt / sich bey Buͤrgermeister / und Rath daselbst angeben / und zu nechstkommenden Rathstag mit zwey / oder dreyen seiner Freun­den und Nachbaren seine Bitt der Burgerschafft halber im Rath zum besten anbringen / auch habende warhaffte Gezeugen / sein / oder seiner Elteren in unser Statt Nachbaren / oder wohe er außwendig und frembdt were / glaubwuͤrdigen Schein von seiner Obrigkeit darunder er zuvor gewohnet / und abzuziehen bedacht in effectu inhaltende / daß er sich daselbst ehrlich und wohl gehal­ten / in Originali vorbringen / und ihn zu unserem / und der Statt Buͤrger-Recht auff- und anzunehmen / auch was sich dargegen zu erstatten und zu thuen gebuͤhrt / gehorsamblich zu leisten erpieten / so sollen der / oder die Buͤrgermeistere alßdan solch sein Erbieten / Bitt und Schein von ihme annehmen / und zum negsten Raths-Tag anbringen / darauff umbfragen / und sich der Raths bedencken / und Bescheidts erholen / auch deme gemeß erzeigen / etc.

Wofern nun seiner Bitt statt gegeben wird / soll man ihn bescheiden gegen den negsten darnach folgenden Raths-Tag mit seinem Buͤrger-Geldt / lauth hernach gemelter Ordnung und Tax zu erscheinen / dasselbe dem Rath / oder Renthmeister paar zu legen / des Raths Bescheidt anzuhoͤren / und die schuͤldige Buͤrgerliche Pflicht / und Aydt zu leisten;

Wan nun der Buͤrgers Sohn / oder der außwendig Frembling vor Rath erscheinet / und man der vorbrachter Kund­schafft / oder auch Respective des Scheins halber mit ihme zufrieden / und ihn zu einem Buͤrger anzunehmen entschlossen / und willig ist / so soll er in Rath gefordert / und ihme durch den Buͤrgermeisteren zur Zeit / wie folgt / in effectu vorgehalten werden;

Es haben Buͤrgermeistere / und Rath die vorbrachte Kundtschafft / oder den erforderten Schein im Rath gehoͤrt / und gelesen / und seynd darmit zufrieden / und fragen Dich / oder Euch nachmahls / ob Du oder Ihr jetzo hier nachmahls ersche­inet / Unseres Gnaͤdigsten Churfuͤrsten / und Herren Buͤrgerschafft / oder Buͤrger-Recht zu empfangen; wan Er da darauff mit Ja antwortet / so solle der Buͤrgermeister Ihme ferner anzeigen / wie folget. <9> Burgermeistere / und Rath seynd willig Dich oder Euch zum Buͤrger / und Buͤrgerlichen Rechten / und Freyheit jetzo anzunehmen / doch soll man Dir / oder Euch jetzo etlich nachfolgende Puncta, oder Vorworth anzeigen und vorhalten / die Du / oder Ihr mit auffgestreckten Fingeren leiblich betauren sollet / befinds sich deren eines an Deiner oder Ewerer Persohn mangel / und daß Du oder Ihr solches innerhalb Jahr / und Tag auff Anmahnung / und Gebott Buͤrgermeister / und Raths nit abschaffen werdet / so soll Dein oder Ewer Buͤrgerschafft / und Buͤrger-Recht jetzo alß dan / und dan alß jetzo nichtig / und revocirt seyn / und bleiben;

2. Hie soll man Ihnen den Bürger Aydt vorhalten / wie folgt

Erstlich solstu g[e]loben / daß Du / auch den Weib / und Kinder der alten wahren Roͤmisch-Catholischen Religion, Kir­chen Ordnung / und Zeremonien, wie die jetzo Unser Gnaͤ­digster Herr der Ertz-Bischoff / und Churfuͤrst zu Coͤllen / etc. in seinem Ertz-Stifft / auch dieser Statt Pfarrkirchen lehren / predigen / und uͤben lasset / sein / und bleiben / auch darmit dich settigen[?] / und dargegen nicht setzen / noch aufflehnen sollest / oder wollest / etc.

Zum Anderen / daß du keine nachfolgende Herren der Leib Aigenschafft halber habest / etc.

Zum Dritten / du keines Herren ohn Recessirter Ambtman / Kellner / oder Diener seyest /

Zum Vierten / daß du kein außwendige Feindschafft habest / deren du noch nicht außgesoͤhnet / oder so nicht vergliechen ha­best /

Zum Fuͤnfften / daß du in keinem geistlichen Bann / oder Kaͤyserlicher Acht seyest /

Zum Sechsten / daß du Unserem Gnaͤdigsten Churfuͤrsten / und Herren / Buͤrgermeister / Rath / und der Statt in allen Lands- und der Statt / und deren Freyheiten / Ehehafften / und [C] <10> Nothsachen unterthenig / gehorsamb / behuͤlflich / und pflichtig seyn wollest

Ferner solst Du nunmehr Mir und meinen Buͤrgermeisteren / von des Raths und dieser Statt wegen ang[e]loben / und darnach zu GOtt / und den Heyligen mit auffgerichten Fingeren deiner Rechten schweren / daß Du unserem Gnaͤ­digsten Churfuͤrsten / und Herren zu Coͤllen / etc. und seinem Ertz-Stifft Erstlich / darnach auch Buͤrgermeisteren / und Rath die­ser Statt Bonn / von diesem Rath an / und fort alle Tag / und Zeit / Getrew / Holt / Gehorsamb / Gefolglich / und Gewertig seyn / und bleiben wollest / Seiner Churfuͤrstl: Durchl: und Dero Ertz-Stifft / wie auch dieser Statt Bestes werben / Args / und Scha­den warnen / GOttes Lob / und Ehr hoͤchstgemelter Churfuͤrsten Hochheit / Obrigkeit / Gericht / Recht / und Ordnung des Raths / und dieser Statt wohlherbrachte Buͤrgerliche Privilegien / Freyheiten / gute Gewonheit / und Herkommen / denes besten Vermoͤgens halten / und handthaben / und so offt Du vor Rath / und Ge­richt verbottet / oder erfordert wuͤrdest / gehorsamblich erscheinen / auch sonst dem Rath der Pollicey / und darzu gehoͤrigen Braͤu­chen / Gebotten / und Verrichtungen Gemeiner Statt-Werck / und nothwendiger Wacht gehorsamblich seyn / des Ertz-Stiffts Coͤllen Landt-Vereinigung / deßgleichen auch den Verbundt / zwischen den Staͤtten Koblentz / Andernach / und Bonn {der Sammentlicher Buͤrgerschafft / Underzugs / und Kommer-Rechtens Freyheit halber auffgericht} halten / und auch mit hoͤchstgedachten Unse­rem Gnaͤdigsten Churfuͤrsten und Herren ordentlichen Hohen Gerichts Rechten gegen deine Mitbuͤrger zu Bonn begnuͤgen las­sen / und die an kein außwendig Kaͤyserlichen Hoff / Freyen Stuehl oder ander Gericht / Weltlicher Außsprachen / oder Sachen hal­ber / dahe Dir kein Recht geweigert / bey straff / und Verlust deiner Buͤrgerschafft / außforderen / oder laden / auch die Accins, Geschoß / Wachtgeldt / Zinnß / Rhenten und Gefaͤlle / so Du dem Rath / dem Hospital³, der Pfarr-Kirchen / der Armen Spenden / und Leprosen⁴ Jaͤhrlichs zu handtreichen schuͤldig wuͤrdest / zu rechter Zeit ohnweigerlich entrichten / und bezahlen / auch sonst alles / und jedes / was einem frommen / und gehorsamen Buͤrgeren zu thuen / und zu laßen / von Rechts und guter Gewonheit wegen aͤignet / und gebuͤhret / gehorsamblich bey verpfaͤndung aller deiner Haab / und Guͤter / thuen / und verrichten wollest, etc. <11>

Wan dan der Buͤrgermeister diß dem Newen Buͤrgeren / also / wie gemelt / vorgehalten / oder lesen hat laßen / so soll der Buͤrgermeister demselben auff diese Meinung den Buͤrger-Aydt gestatten / und schweren laßen /

Wie Mir jetzo vorgehalten / und ich mit Worten / so Ich wohl verstanden hab / underschiedtlich bericht worden bin / und mit handtgebender Trewe angelobt und versprochen hab / das alles will ich trewlich / steht / vest / ohnwidersprechlich halten / also helff Mir GOtt / und seine Heylige Evangelia, Amen.

Darnach soll der Buͤrgermeister dem Newen Buͤrger / in krafft geschwornen Aydts von hoͤchstgemelt: unseres Gnaͤdigster Herren / und des Raths wegen erstlich befehlen / in­nerhalb vierzehen Tagen Ihme ein gutt Seithen-Wehr / ein gutt Ziehl-Rohr mit seinem Zubehoͤr zu verschaffen / gestalt hoͤchstgedachtem Churfuͤrst / und dem Ertz-Stifft / auch dem Rath / und der Statt auff erforderen / damit im fall der Notturfft zuzuziehen / und zu denen / deßgleichen sich zu einer Gaffel / Gesellschafft / oder Zunfft / wie braͤuchlich / zu gehen / einschreiben / und im fall der Noth sich dabey finden zu laßen.

Wan nun ein Buͤrgers Sohn / wie obgemelt / sich in Ehrlichen Standt begibt / und buͤrgerlich verpflichtet / soll Er am Buͤrger-Geldt mehr nit / dan 16 Albus / zu geben schuͤldig seyn / davon soll jedem Buͤrgermeisteren 6 Albus fur ein Urkundt / dem Statt-Schreiberen dieses ins Raths-Buch zu schreiben 2 Albus / und dem Statt-Botten geruͤrten Buͤrger-Sohn vor zu bescheiden / auch der Gaffel zu verkuͤndgen 2 Albus bezalt werden;

Dahe dan beruͤrter Buͤrgers Sohn / alß ein Ambts-Gesell / und Handtwerchsman sein Ambt gebrauchen woͤlte / soll Er fuͤr Ambts Gerechtigkeit mehr nit / alß das von Alters ge­woͤhnliche Halbgeldt zu geben schuͤldig seyn / und vor Außwendigen / und frembden dießfalß so viell Vortheils haben; [C] <12> Wan aber außwendig herkommende frembde Personen / und Eheleuth der Buͤrgerschafft begehren / Schein / und Kundschafft / wie oben gemelt / vorbringen / sollen sie vor ihre Buͤrgerschafft Sechs Goldtguͤlden zubehueff der Statt dem Rentmeisteren in Rechnung zu bringen / und dan noch 16 Albus / wie droben erwehnet / außzutheilen geben;

Dieweil auch hiebevoren herbracht / welcher Armuths / oder sonst geringer Nahrung / und Gelegenheit halber das obgemelt gewoͤhnlich Buͤrger-Geldt nit erlegen / oder zahlen koͤnte / daß Er zu einem Buͤrger nit angenohmen / und zugelaßen werden solle / so lassen Wir es auch nochmahlß dabey bewenden / es geschehe dan mit Wissen unserer Burgermeister / Scheffen / Rath / und Zwoͤlffter dergestalt / daß man sich dißfals eines jeden gelegenheit zu vorhin gruͤndlich erkuͤndige / und keine affection, und hinderdencken vorhanden / und man befinde / daß es fromme / und getrewe Arbeiter weren;

Da sich auch zutruͤge / daß einiger Buͤrger / oder Buͤrgerin / ausserhalb der Statt / oder Buͤrgerschafft an andere orther / ohne vorwissen unserer Buͤrgermeister / und Rath / mit haͤußlicher Wohnung / und Nahrung sich begeben / und daselbst sich haͤußlich verhalten / Jahr / und Tag außbleiben wuͤrden / dieselbe sollen ohne Mittel ihre Buͤrgerschafft / und buͤrgerliche Frey­heit / und Gerechtigkeit verlohren und verwirckt haben / und dahe sie etwan hernach wider anhero gegen Bonn mit der Haußhal­tung kommen / und sich niderschlagen wuͤrden / oder wollen / sollen sie die Buͤrgerschafft von newem zu bitten / zu erlangen / und zu gelten schuͤldig seyn, etc.

Wohe auch einig Buͤrger / oder Buͤrgerin sich gegen Einen Ehrbaren Rath mit offenbahren ungehorsamb in buͤrgerlichen sachen muthwillig vergreiffen / und erzeigen wuͤrde / oder erzeigt hette / also daß Ihme / oder Ihr deßwegen die Buͤrger­schafft moͤchte auffgekuͤndigt werden / so soll doch solches anderst nit / dan auff vorgangen Verhoͤr / und eintraͤchtigen willen / und erkentnus Buͤrgermeister / und sambtlichen Raths / und deren Zwoͤlffter geschehen;

Man auch dieser gestalt dem Buͤrger / oder Buͤrgerin die Buͤrgerschafft auffgesagt / so soll man sie nit bald wider darzu kommen lassen / sie haben dan solchen muthwillen abgebetten <13> nach befindung der Sachen abtrag gethan / und die Buͤrgerschafft von newem mit obgemeltem Buͤrger-geldt erbetten / und erworben;

Dahe sich aber jemandt dann wuͤrde weigeren / in die Buͤrgerschafft de facto dringen / der / oder die Persohnen sol­len / vermoͤg unser Vorfahren gegebenen Abscheidt / bey unserem Ambtman / und Vogt / angeben / verklagt / zum Gehorsamb / und gebuͤhrlicher straff gebracht werden.

3. Von der Buergermeister Aydt und Ambt.

Dieweil auch das Buͤrgermeister Ambt in Unserer Statt Bonn zu dasiger Buͤrgerlicher Policey-Regierung / und Weeßen hochnoͤthig / und an Geschicklichkeit / Discretion, und Erfahrung darzu erwehlen­der Persohnen mercklich / und viell gelegen / so sollen hinfuͤran die Raths-Persohnen mit allem fleiß dahin gedencken / und trachten / daß Sie zu solchem Buͤrgermeister-Ambt / und dessen Verwaltung fleißige / ernste / fromme / ehrbare / und beschei­dene erfahrene / und Friedt-liebende Persohnen in Zeit der Wahl / oder Chuͤr ohne einige affection erwehlen / und ziehen / auch darunter jederzeit vornemblich bedencken / daß die juͤngste / zu welcher geschicklichkeit man Hoffnung hat / mit / und neben denen aͤltisten angefuͤhrt / und adjungirt werden;

Dan es sollen hinfuͤhro unser Statt Bonn / wie von Alters braͤuchlich / alle / und jeden Jahrs Zwey Buͤrgermeister {deren einer Unsers Hohen Gerichts Scheffen / der ander des Raths / und auß der Buͤrgerschafft seyn soll} in Buͤrgerlichem Weesen / und sachen dem Rath / und Gemeinden / alß Vorgaͤnger und Haͤubter mit getrewem Ernst vorstehen;

Diese sollen auff New Jahrs Abendt erwehlt / und mit hernach gesetzten Aydt / und Pflichten beladen / angenohmen / und darfuͤr zu ehren / und zu halten / den Zwoͤlffteren an statt der Ge­meinden des folgenden Morgens nach der Predig / und verrichtung des Ambts der Heyl: Meß / auff dem Raths-Hauß publicirt, und verkuͤndigt werden.[D] <14>

Wan aber derselbiger Buͤrgermeister einer / oder beyde auß Unseren Scheffen / oder auch auß Unserem Buͤrger-Rath von Uns benent / oder / wie folgt / erwehlet / hernechst nach dato dieser Unser Ordnung Todts abgehen / auß der Statt Bonn mit der Haußhaltung an andere Orth beharlich abziehen / erheblicher Ursachen / und Gebrechs halber solchem Buͤrgermeister Ambt lenger nit abwarten koͤnte / wie sich etwa der Fall bebege[!] / so soll durch uͤbrige Buͤrgermeistere / und Rath auß unserem Scheffen Stuhl / oder aber Respective auß unserem Burger Rath / Zwoͤlffter / oder Gemeinden an des abgestorbenen Buͤrgermeister statt ein ander wuͤrdige / ehr- und Friedliebende fromme haabsehlige Catholische bequeme Persohn an Tag / und Zeit / auch Mahlstatt / wie oben gemelt / erwehlet / publiciret / beaͤydiget / und in Rath gesetzt werden.

4. Form des Aydts.

Ihr sollet g[e]loben / darnach schweren / wie folgt / des / Buͤrger und Gemeinen Raths Aydt in dieser Policey-Ordnung gesetzt / wie Euch die jetzo von wort zu Worten vorgelesen worden / sollet Ihr / soviel Euch / und Ewere Persohn / und Raths-Ambt belangt / de­ren allen nit vergessen / sonderen auch so viell / und fern unseres Gnaͤdigsten Churfuͤrsten / und Herren publicirte newe Reforma­tion, und Ordnung Euch / und Ewer Buͤrgermeister-Ambt an­trifft / die vor allen dingen trewlich halten / so viel aber dieselbe andere Raths- und Buͤrger-Persohnen Ambt / und befelch beruͤret / dieselbe wie …vem ernstlichem fleiß dahin weisen / vermah­nen / und halten / daß dero gehorsamet / und nachgelebt werde;

Dergleichen daß Ihr des Raths dieser Statt / und Gemeinden Recht / und Gerechtigkeit / Privilegien / und gute Gewonheiten / nach allem Ewerem Vermoͤgen / wollet handt­haben / auch dero Statt / des Raths / und der Gemeinden Geldt / und Gefaͤlle {wie das hiebevor von Alters / und jetzo von Unserem Gnaͤdigsten Herren zu befuͤrderung des Gemeinen Nutzens / und abhelffung des obligenden Schulden-Lasts dieser Statt auß gnaden gnaͤdigst erhoben / bewilliget / und Euch / und den Rath auch in beyseyn der Zwoͤlffter durch den Rentmeister / und andere Officianten <15> des Raths zu angezeigter verordneter Zeit gelieffert werden soll} nit in Eweren Privat Nutz gebrauchen / sonderen unverzuͤg­lich / und zum lengsten gegen den Ersten Raths-Tag darnach / in des Raths- und Gemeiner Buͤrgerschafft Archivium / oder Custodiam liefferen / die Summam, und Nahmen eines jeden Officianten / deßgleichen das Jahr / Monat / Tag / und Stunde solcher Liefferung / in beyseyn der / so darzu die Schluͤssel haben / in des Raths darzu verordnet Special-Empfang-Buch durch den darzu Geschwornen Statt-Schreiberen ordentlich einschreiben laßen.

Gleicher Gestalt / wan / und was Zeit dem Rentmeister / oder einigen anderen des Raths Officianten zu einem berathschlagtem nothwendigem Baw / Reißen / oder einige andere Sachen ein kleine / oder Große Summa auß des Raths Kasten / Archivo, oder Verwahrung etwas zu bezahlen / und zu verrichten befohlen / und gelieffert werden soll / daß Ihr auch solche Summam hinwiderumb gegen desjenigen Befelchhabers / und Officianten Recognition-Zettul / auch in des Raths jetzo verordneten General Außgaben-Buch / mit vermelden des Empfangs / und der Außgaben Ursach / deßgleichen Jahrs / Tags / Orths / und Monaths einschreiben / gleicher Gestalt / daß Ihr ohne Vorwissen und wil­len Eines Ehrbaren Raths / oder Gemeinden / und Zwoͤlffter ke­inen Newen / oder Alten ungewoͤhnlichen Baw / oder auch einige Pension, Dienst-Geldt / oder andere Verschreibungen auffrichten / eingehen / oder bewilligen wollet.

Ihr sollet auch g[e]loben / und schweren / daß Ihr die Buͤrger / und Partheyen so vor Euch / und dem Rath mit ihrem Widertheilen guͤtlichen Verhoͤer / und Vergleichung begehren oder dem Rath etwas vorzutragen hetten {soviel Euch / und Ihme das obligt / und gebuͤhrt} guͤtlich / und gern hoͤren / und von einem biß zum anderen / oder dritten Raths-Tag nit gefaͤhrlich auffhalten / oder verweisen / sonderen in Guͤte zu vergleichen / und ihnen auff ihr anligk / fuͤrderlich und behuͤlfflich seyn / daß ihnen des Raths Antwort / und bescheid mitgetheilt werde / moͤglichsten fleiß ankehren: Item allen Eweren Einnehmens / so zu Eweren Handen kommen / außgeben / thuen / und lassens / vor / und zu Außgang Eweres Jahrs / oben / und hernach bestimbt / gebuͤrliche / auffrichtige / und gnugsame Rechnungen / und Liefferung deren Testamenten zu thuen / auch von den Renthmeisteren und anderen Officianten / so offt es [D2] <16> noͤthig / zu gebuͤrlicher Zeit ernstlich / und trewlich forderen / desgleichen die Accins, Geschoß / Wacht-Geldt / Zinß / und Gefaͤlle / so ihr Jaͤhrlichs fuͤr ewere Persohn von eweren Guͤtteren / Handtierung / und Gewerb dem Rath / oder Statt / Hospital, Pfarr-Kirchen / Hauß-Armen / oder Leprosen schuldig worden seydt / jedes zu rechter gebuͤrlicher Zeit bezahlen / und entrichten / auch sonst alles / und jedes / was einem Frommen / und Getrewen / Buͤrgermeisteren / von Ambts / und dieser Ordnung wegen / ge­buͤhrt / und wohl anstehet / wuͤrcklich / und ohnweigerlich / bey eweren wahren Worten / trewlich leisten wollet / Also das Euch GOtt helffe / und seine H[eilige] Evangelia:

5. Von deren Raths-Persohnen Zahl / Wahl / Aydt / und Ambt.

Wir ordnen auch hiemit / daß hinfuͤhro in dem jetzo von Uns gesetztem / auch kuͤnftigem Rath Unser Statt Bonn / Fuͤnffzehen Verstaͤndige / Fromme / Ehr- und Friedt-Liebende / Haabsehlige Catholische Buͤrger seyn / bleiben / und continuirt, und solche Zahl nit uͤberschritten wer­den soll / Deren Drey auß Unserem Scheffen-Stuhl / die ande­re auß den Zwoͤlffteren / oder gemeiner Buͤrgerschafft / so am Geschicksten / Verstendigsten / und Tauglichsten erachtet / zu obbenanter Zeit erwehlet / und angesetzt werden sollen.

Wan dan dero Raths-Personen Ein- oder mehr hernechst Todts abgienge / oder anderer Ehrhafften Ursachen hal­ber abgehet / abziehen / und entsetzt wuͤrde.

So soll durch Buͤrgermeister / Scheffen / und Rath auß den zur Zeit / oder auch gemeiner Buͤrgerschafft Ein- oder mehr nothduͤrfftige Raths-Persohnen an des / oder der Verstorbenen Raths-Persohnen statt {so darzu am taͤuglichsten / oder auch Geschicksten erachtet} erwehlet / adoptirt / publicirt / beaͤydet / und im Rath / wie oben gemelt / eingesetzt werden. <17>

Wir setzen / und ordnen auch hiemit / daß diese obangeregte Persohnen hinfuͤran alher / und jede Wochen am Ding­stag / zu Morgen von Unser Frawen Lichtmeß-Tag den 2. Februar an / biß auff St. Remigii Tag exclusive, wan die Klock auff der Statt Buͤrger-Hauß 7 und nach St. Remigii tag den 1. Oktober biß wider zum dritten Februar 8 Uhren schlagt / in puncto auff dem Buͤrger-Hauß an gewoͤhnlicher Raths-Statt / oder auch sonst / so offt es die Raths / und Statts Nothdurfft / und Nutz erfordert / auff der Buͤrgermeister zur Zeit erforderen / zusammen kommen / und von Unser Statt Bonn / des Raths / und Gemeinen Nutzens vorfallender Sachen halber rathschlagen / und dieser Unser Ordnung gemeeß tractiren / und schliessen sollen;

Im fall aber in- oder ausserhalb des Raths etwas vorfallen / proponirt, und berathschlaget werden solte / so tacite, oder außtruͤcklich Unsere / und Unseres Ertz-Stiffts Hoch- oder Herrlichkeit / und Gerechtigkeit betreffen / und demselben zu Nach­theil gereichen moͤchte / so soll zu solchen sachen / und Rathschlaͤ­gen jederzeit Unser Ambtman zu Bonn / oder seines Abwesens jemandt von Unseren Raͤthen ohn alle Fehle erfordert / oder in deren Eines / oder des anderen Gegenwertigkeit darin die nothdurfft vorbracht / bedacht / und mit ihrem Rath / und Gutachten verfah­ren / und beschlossen werden / welche dan / daß Unß / und Unserem Ertz-Stifft anhabender Hoch- Herrlich- und Gerechtigkeit zu Nachtheil / Eintracht / oder Abbruch nichts vorgenommen werde / ein getrewes fleissiges Auffsehen haben / auch Buͤrgermeister / und Rath erheischender Notturfft nach / darin trewlich warnen / und vermahnen / und da deme zuwider ichtwas anzustellen verstanden wuͤrde / Uns / oder Unseren Nachkommen / anzubringen / und daruͤber Unseres Bescheidts / und Befelchs zu erwarten schuldig seyn sollen;

Damit dan die Raths-Taͤge desto fleissiger besucht / so soll denen Raths-Persohnen {welche zu bestimbter Stundt / Tag / und Platz erscheinen / dem Raths-Tag / und Zeit gehorsamblich abwarten / auch dem jenigen / so auß Buͤrgermeister / und Raths befelch in der Statt / und Raths-Sachen verschickt / oder sonst kuͤndtlicher Leibs Unvermoͤgenheit halber im Rath zu erschei­nen verhindert were / die von Alters herbrachte gewoͤhnliche Praesentz zu Ende der Consultation gegeben werden / aber die jenige / so nach der bestimbter Raths-Stunden kommen / sollen eo ipso [E] <18> facto solche der zeit fallende Praesentz verwirckt haben / die aber auß dero berathschlagung / ohne erhaltene Erlaubnus / abgehen / sollen nit allein die gewoͤhnliche Praesentz damit verliehren / sonderen auch drey Rader-Albus zu bezahlen schuldig seyn / etc.

Welche in die darzu verordnete / von Alters gewoͤhnliche Gemeine Buͤchß geworffen / und jederzeit under die Raths-Persoͤhnen / so Praesentes seint / und bleiben / und das Gemeine Beste befuͤrderen helffen / getheilt werden sollen.

Were auch sach / daß es sich begebe {so doch nit seyn soll} daß Ein / oder mehr Raths-Personen / zu einiger Zeit in der Christlicher Kirchen Bann / oder Kaͤyserl: Majestaͤt Acht declarirt weren / Der / oder die jenige sollen bey hoͤchster Unserer Straff / und Ungnaden / auch Verlust des Raths-Sitzes die besuchung des Raths / und Raths-Taͤgen vermeiden / Buͤrgermeister / und Rath solche gelegenheit anzuzeigen schuldig seyn / also daß Er / oder Sie / ehe / und bevor den Bann / oder Acht abgeworffen / und derohalben glaubwuͤrdgen Schein der Absolution Buͤrgermeisteren / und Rath gezeiget / und dargelegt haben / in den Rath ferner nit gehe / noch komme / es begebe sich dan / daß Buͤrgermeister / und Rath auß sonderlichen bewegenden Ursachen den / oder die Gebandte / oder declarirte Acchter vor sich zu Rath / oder ad Partem, umb nothwendigen Bericht zu geben / erforderten.

Wofern aber Jemandt uͤber diß / in stehender / und wehrender Excommunication, oder Acht / ohne einige Absolution, sich eigenes Willens in Rath druͤnge / den soll der Buͤrger­meister einmahl fuͤr all abweisen / Der / oder Dieselbe auch / im fall ihres Ungehorsambs / auff anzeig Unserer Buͤrgermeister / durch unseren Ambtman / oder Vogt abgehalten / und gestrafft werden.

Ob sich dan kuͤndtlich etwa begebe / daß zwischen einem / oder mehr Raths-Genossen in sitzendem Rath / oder auch ausserhalb demselbigem / einiger Unwill / Schmaͤh / oder Gezaͤnk mit Worten / oder Wercken erhuͤbe / oder zutruͤge / darauff haben Wir / Einigkeit / und bestendigen Frieden zwischen den Raths Persohnen zu erhalten / auch Unkoͤsten / Muͤhe / Schaden / und Weiterung zu verhuͤten / Buͤrgermeisteren / und Rath die alte Ordnung / und herbrachte Gewohnheit dahin erklert / und bestettigt / daß die Raths Persohnen welche in Raths- Statt- <19> oder auch ausserhalb des Raths / oder gemeiner Statt Sachen halber miteinander ohngeferlich mit Worten / und Wercken auffstoͤßig / und zum Unwillen / Gezanck / oder Schmaͤhe kommen / solcher ihrer sammen habender irrungen Schmaͤhe Wort / und Werck halber / so kein Leibs Straff auff sich haben / oder tra­gen / bey Buͤrgermeister / und Raths Summarischer Erkandtnus / ohne einige Weiterung / bleiben / und sich darmit entscheiden / und settigen lassen sollen / etc.

6. Inhalt und Form des Aydts.

Ferner sollen die Raths-Persohnen dieser vorgemelter Steur / und des hiebevor geleisteten Buͤrger Aydts / fleißig erinnert werden / zu deren Buͤrgermeister zur Zeit Handen g[e]loben / und mit auffgerichten Fingeren schweren / wie nachgeschrieben stehet.

Alß Sie dem Hochwuͤrdigsten Fuͤrsten / und Herrn / Herrn N. Erwehltem / und Bestettigtem Ertz-Bischoffen zu Coͤllen / des Heyligen Roͤmischen Reichs durch Italien Ertz-Cantzelern / und Churfuͤrsten / Hertzogen in Westphalen / und zu Engeren / Ihrem Gnaͤdigsten Herrn / und Ihrer Churfuͤrstl: Durchleucht Ertz-Stifft / als ihrem rechten Herren von diesem Tag an / und fort diese Tag alle / Getrew / Holdt / und Gehorsamb seyn / Seiner Churfuͤrstl: Durchleucht Schaden wahrnen / und bestes werben / Hochheit und Herrlichkeit behalten helffen / nach allem ihrem Vermoͤgen / auch der Statt / und dem Rath gehorsamb / und gewehrtig seyn / und dem Rath / so dick / und offt sie Verbott / und erfordert werden / sonderlich / wan ihnen ein Schildt bracht / oder gegeben wird / gehorsamblich folgen / und sich mit widerliefferung des Schildts zu angesetzter Stunde / und zeit einfinden / daselbst biß zu Ende der Sachen bey dem Rath bleiben / und nit von dannen gehen / sie haben dan von Buͤrgermeister / und Rath erlaubnus begehrt / fort die von Hoͤchstgemelt: meinem Gnaͤ­digsten Herren gegenwertig ligende new gegebene Reformation, und Ordnung in allen / und jeden ihren Clausulen / Puncten / und Articulen {so viel ihre Persohn / und Ambt dieselbe anlangt} stett / und vestiglich halten / auch was darwider ist / und vorgenommen [E2] <20> wird / dessen sie gewahr werden / nach ihrem Vermoͤgen wehren / in Raths statt vermelden / und nit verschweigen / sonst andere des Raths Heimlichkeit Heehl / und Rathschlaͤge {so gegen ihren Gnaͤdigsten Herren / sein Ertz-Stifft / und diese Reformation nit seyn } hehlen / biß in ihr Grab verschweigen / und niemand offenbahren / GOttes Lob / Ehr / Friedt / Einigkeit / und das Gemeine Beste vorkehren / und befoͤrderen / den Verbundt zwischen den Staͤtten Bonn / Andernach / und Coblentz halten / auch daran seyn / daß die Erblich gestifftete von Feichen / Koͤnigsberg / Tilman Schroͤder / Simon Becker / Niessen / Duͤnnewaldt / und Lisbeth Heckenbusch vorzeiten auffgerichtete Messen / deßgleichen / daß die Ein hundert Malder Korns {so ein Ehrsamer Rath zu behueff dero Gemeiner Buͤrgerschafft / und underhaltung der Armen im Hospital von weyland: dem Ehrsamen / und Wohlerfahrnen Emundo von Elsich⁵ Protonotarien der Statt Coͤllen / und seinem Sohn Johann / denen GOtt genade / im Jahr 1460 empfangen hat} nach Lauth dero daruͤber auffgerichteter Brief / Fundatum GOtt dem Allmaͤchtigen zu Lob / und Ehren / deren verstorben Seelen zu Trost / und den Gottes Armen in gemeiner Buͤrgerschafft zum besten gehalten / in Weesen bracht / verwahrt / reculerirt / und außgespendt werden;

Desgleichen die Accins / Geschoß / Wacht-Geldt / Zinns / und Gefaͤlle / so sie Jahrlichs fur ihre Persohn von ihren Guͤteren / Gewerb / und Handtierung dem Rath / der Statt / dem Hospital / der Pfarr-Kirchen / den Hauß-Armen / oder Spenden schuͤldig worden seint / zu rechter gebuͤhrlicher Zeit bezahlen / und entrichten / auch alles / und jedes / was ein getrewer / gehorsamer Raths-Freundt / und Raths-Genoß sonst von rechts / und guter Gewonheit wegen zu thun schuͤldig ist / getrewlich / und ohn alle gefehrde / und arglist / bey ihren wahren worten / zu aller Zeit wuͤrcklich thun / und leisten wollen.

Demnechst sollen sie mit auffgestreckten fingeren leiblich zu Gott ang[e]loben / und schweren / dieser gestalt / Was Unß jetzo vorgehalten / und Wir wohl verstanden haben / deme wollen Wir also fleißig / und getreulich nachkommen / So uns Gott helffe / und seine Heylige Evangelia. <21>

7. Von den Zwölffteren.

Wir ordnen / setzen / und wollen / daß in Conformiret der Zwoͤlff Gemeiner Maͤnner / oder so genanter Zwoͤlffter Unsere Gemeine Buͤrgerschafft auch in Zwoͤlff Gaffelen / oder Zuͤnfften außgetheilt und bestehen; Dahero neben denen vorhin gewesenen Eylff Zunfften {benentlich deren / Becker / Schneider / Leinenweber / Schuechmacher / Schmidt / Schreiner / Glaßmacher / Fleichhaͤwer / Faßbinder / Maͤurer / Schiff und Fuhrleuth} auß den Breweren / Bierzaͤpfferen / und einigen anderen beygeschwornen Buͤrgeren / die Zwoͤlffte Gaffel auffgerichtet werden solle / zu welchem Ende denen alhiesigen Breweren / so bißheran das Brew-Weeßen geuͤbt / auch wuͤrcklich mit eigenen Brew-Haͤußeren versehen / und mit Verlassung anderer Zunfften / auff dieser Brewer-Zunfft sich einschreiben und veraͤyden werden / die Brew-Meisterschafft / und Gewaldt / Knecht / und Jungen anzunehmen / und Zunfftmeßig zu lehren / hiemit in Gnaden ertheilt / mithin anbefohlen wirdt / under ihnen eine Zunfft-Ordnung einzurichten / selbige zu unserer gnaͤdigster Approbation underthenigst einzuschicken / in dessen aber solle dieser Brewers-Gaffel sowohl / alß einer jeder von uͤbrigen Zunfften / oder Gaffelen durch Unser zu allhiesigem Statt-Weßen anjetzo gnaͤdigst verordnete drey Commissarien ein Zwoͤlffter zum Vorsteher vor dasmahl vorgestelt / und beaͤydigt / so dann von Unserentwegen denen Gaffelen / und gemeiner Buͤrgerschafft Friedt / und gezimmende Folgleistung gebotten werden.

Wan nun solcher Zwoͤlfter einer zum Raths-Verwandten gemacht / mit Todt abgienge / oder aus der Statt anders wohin verzuͤge / abstuͤnde / oder sonst solch Ambt zu verwalten nit tauglich befunden / und derenthalben mit wissen / und gut befinden erwehnter Unserer jetziger / oder kuͤnfftiger Commissarien / von Buͤrgermeister / Rath / und Zwoͤlffteren abgesetzt wuͤrde / alßdan soll gedachte Gaffel sich alßbald bedencken / und einen anderen Ehrlichen / Taͤuglichen und qualificirten Mann auß ihrem Mittel / und Beygeschwornen Buͤrgermeisteren und Rath zu [F] <22> praesentiren macht haben / welcher dan auch also forth beaͤydigt / zugelaßen und vorgestelt werden solle.

Dahe sich wider verhoffen begeben wuͤrde / daß ein Buͤrger / oder Beygeschworner den anderen / wan die Gaffelen etwa Gemeinen Anligens halber / versamblet / mit Zanck / und Schelt-Worten angrieffe / soll der / oder die jenige das erstemahl einen Goldtguͤlden zum Statt-Baw / das andere mahl Zwey / und zum dritten mahl nit allein drey Goldtguͤlden verwuͤrckt haben / sonderen dessen Nahm auß den Gaffel Buch {in welchem durch den Zeitlichen Zwoͤlffter der Buͤrger Vor- und Zunahmen / so auff der Gaffel geschworen / nach / und nach / mit anmerckung eines Je­den Handtwerchs / oder Handtierung / eingeschrieben werden} alß eines unfriedsamen Tumultuosen Gliedts außgethan / und fuͤrdershin in der Gaffel / oder Gemeiner Versamblung in dreyen Jah­ren der Zutritt nicht gestattet werden;

8. Inhalt der Zwölffter Aydts.

Ihr wisset der Puncten / und Articulen / so man Euch hiebevor / da Ihr Buͤrger worden / und angenohmen / Euch vorgehalten / Ihr anglobt / und geschworen habt / noch ungezweiffelt wohl zu erinneren / und sollen Euch zur besserer entsinnung jetzo auch nochmahls von Wort zu Wort vorgelesen werden; wan das geschehen / soll Unser regierender ge­lehrter Buͤrgermeister Ihme ferner dieses vorhalten;

Dieweil Ihr nun jetzo von Ewerer Gaffel / und Geschwornen zu einem Zwoͤlffter erkohren / und von dem Rath / Vermoͤg unseres Gnaͤdigsten Herrens Reformation, und Ordnung anzunehmen praesentirt worden seyt / so sollet Ihr / oder Du / diß / wie nachfolget / ferner erstlich angloben / und darnach schweren / zu halten /

Nemblich / daß Ihr dem Zwoͤlffter-Ambt von diesem Tag an / fuͤrter so lang Ihr daran seyt / und seyn werdet / getrewlich / und mit allem fleiß vorstehen / GOtt / seine Gerechtigkeit / die Warheit / und Gemeinen Nutzen / Unseres Gnaͤdigsten Her­rens <23> Hochheit / Obrigkeit / und Reputation, auch eines Ehrbaren Raths / und dieser Statt Bonn Freyheit / und Gerechtigkeit / nach allen Ewerem vermoͤgen / befuͤrderen / vor Augen haben / und Euch daran weder Gaab / noch Geschenck / Freundschafft / Haß / oder Neidt / oder auch sonst alles anderes / was Menschen Sinn / oder List dargegen erdencken mag / uͤberall daran nichts hinderen / noch irren laßen / wan / und so offt Ihr vor hoͤchstgemelten Unse­res Gnaͤdigsten Herrens Ambtman / und Commissarien / deßgleichen auch Buͤrgermeister / und Rath / mit den uͤbrigen Zwoͤlffteren zu Rath / anligender gemeiner Statt / und sonderlich die Particular, und Universal dieser Statt Jahr-Rechenschafft anzuhoͤren / und zu recessiren / zu der bestimbter Zeit / oder auch sonst er­fordert werdet / gehorsamblich erscheinen / nicht außbleibet / auch neben / und mit uͤbriger Gaffelen deputirten Zwoͤlffteren auff die ablesung deren Rechnungen / und darzu gehoͤrger Quitantien / anschaffungen / und Justificationen / absonderlich aber / ob und wieviell an Empfang / oder Außgab uͤberschiesset / mit allem fleiß acht geben; Wohe Ihr einigen Mangel befinden wuͤrdet / daß Ihr den / oder dieselbige zucht- und sittiglich bey / und nach jeder Rech­nungen ablesung und Justification alsobald anzeigen / und dahe Euch / und anderen Zwoͤlffteren von den Officianten / oder auch Buͤrgermeisteren / und Rath solcher bestendiger Gegenbericht / oder ablehnung darauff nit beschicht / daß Ihr Euch darmit vergnuͤ­gen koͤntet / sonderen dawieder ferneren Beschwer / und Einrede hellet / solches an Ewere Zunfft referiren / und deren Gutachten daruͤber einhohlen:

Als Ihr auch bey dem Rath / und in abhoͤrung der Jahr-Rechnungen / und deren Justification sehen / hoͤren / und erfahren werdet / so hoͤchstgedachten Unseres Gnaͤdigsten Herrens Reputation, auch des Raths / und der Statt Ehre / und Heimblichkeit belanget / bey Euch biß in Ewer Grab behalten / und Hoͤchstgemeltem Unserem Gnaͤdigsten Herren / den Ertz-Stifft / denen Buͤrgermeisteren / und Rath / auch der Statt zu Nachtheil niemandt offenbahren / Ewer Accinß / Geschoß / Wacht-Geld / und Zinns / so Ihr dem Rath / der Statt / Pfare-Kirchen / Hospital / Hauß-Armen / Spenden / und Leprosen jaͤhrlichs schuͤldig / zu rechter / und bestimbter Zeit gehorsamblich geben / und bezahlen / auch sonst alles / und jedes anderes thun / und laßen wollet / so Euch von <24> wegen des tragenden Befelchs / und Ambts aͤignet / und gebuͤhret / Also Euch Gott helffe / und seine H: Evangelia.

9. Des Rentmeisters Aydt und Ambt.

Dem Rentmeister sollen nachfolgende Stuͤck vorgehalten werden / Ihr sollet Erstlich angloben / her­nach schweren / diß wie man Euch Vorhalten / und lesen wirdt;

1. Des Buͤrger / und gemeinen Raths Aydt / damit ihr in Zeit / alß ihr anfaͤnglich alhier zum Buͤrger angenommen / und darnach des Raths wordet / auch unserem Gnaͤdigsten Herren den Ertz-Bischoffen zu Coͤllen / dem Ertz-Stifft / dieser Statt / und einem Ehrsahmen Rath obligirt, welche euch auch anetzo auß Unseres Gnaͤdigsten Herren Reformation, und Ordnung / von Wort zu Wort seyndt vorgelesen worden / sollet ihr mit trewem Ernst / stett / und vest zuhalten eingedenck seyn / und nit vergessen;

2. Zum Anderen / nachdem ihr diß kuͤnfftig Jahr zu eines Ehr­bahren Raths / und gemeiner Statt Bonn Rentmeister erwehlet / und benant seyt / so sollet Ihr globen zu Gott / und zu seinen Heyligen Evangelien schweren / daß Ihr alle und jede von den Accins-Meisteren / Pfaͤchteren / und anderen des Raths / und Statt Officianten / oder soͤnsten eingehende Rhenten / und Gefaͤlle / und wie die genandt / wohe sie gele­gen / und gefallen / so dem Rath / und der Statt Bonn zustendig / und in ewer anbefohlen Ambt verordnet / und gehoͤrig sein / in ein sonderlich glaubwuͤrdg Registrum, und Verzeichnus bringen / und bey ewer Einnamb klaͤrlich setzen / und melden / deselbige Rhenten / und Gefaͤlle zu ihren gebuͤrlichen Terminen, und Zeiten ohn einigen Verzug forde­ren / empfangen / und mit allerhand hinderstendigen Restanten getrewlich einbringen / was gemelten Buͤrgermeisteren / Rath / und gemeiner Statt Bonn gutt / und nuͤtzlich ist / in <25> Verwaltung des Ambts thun / und was ohnnuͤtzlich oder schaͤdtlich / vermeiden / und underlaßen / keinen Newen Baw / oder ohngewohnliche große außgab / ohne Buͤrgermeister / und Rath / auch der Zwoͤlffter / und Gaffelen Vorwissen / und Bescheidt auß des Raths / und Gemeinden Gefaͤllen / oder Geldt anstellen / oder thu­en / noch auch einige Materiala zu behueff des Baws / oder sonst an­derst nit / dan mit Rath / und Wissen des Baw- und bey Rentmeisters einkauffen / sonderen vielmehr glaubwuͤrdige / richtige / und klare Rechenschafft Einnehmens / und Außgebens halten / und machen / oder machen laßen; Ewerer Administration in gegenwart Churfuͤrstl: Herren Ambtmans / und Commissarien / zu gebuͤhrlicher / und bestimbter Zeit rechtmeßige Rechnung thun alles das / so dieser Rentmeisterey halber zu Eweren Handen kommen ist / oder durch ewere versaumnus nit eingangen / und Ihr darab Buͤrgermeister / Rath / und Gemeiner Statt schuͤldig bleibt / unweigerlich entrichten / mit der Rechnung / und gegen den Recess liefferen / auch Accins / Geschoß / und Wacht-Geldt / Zinns und Gefaͤlle / so Ihr Jahrlichs fuͤr Ewer Person / Guͤter / und Gewerb dem Rath / der Statt / Hospital, Pfarr-Kirchen / Hauß-Armen / und Lepro­sen schuldig werdet seyn / jedes Jahrs zu rechter Zeit bezahlen / und entrichten / so fort alles das thun wollet / was einem Frommen / Fleißigen / und Getrewen Rentmeisteren von Rechts wegen zugehoͤrt und obligt / alles nach Eweren besten fleiß / und Vermoͤgen / bey verpfandung Ewer Haab / und Guͤter / Also Euch Gott helffe / und seine Heylige Evangelia, Amen.

10. Von den Officianten ins Gemein.

Gleicher gestalt sollet hernegst die andere Aembter / alß da seynt Hospital- Geschoß- oder Wacht-Meistereyen und wie die mehr nahmen haben / durch Buͤrgermeistere / und Rath darzu taͤuglichen / fleißigen / ehrbaren / und getrewen Personen auß dem Rath / oder auß der Gemeinden anvertrawet / und falß deren einer abgienge / oder nit continuirt werdet wolte / darzu ein anderer nach vollendeter Jahr-Rechnung erwehlet / vor eingang seines Ambts aber mit gehoͤrigen [G] <26> auf dasselbe eingerichteten Aydt und Pflichten beladen / auch dahe sich einer / oder mehr solche Aͤembter anzunehmen / und zu bedienen weigeren wuͤrde / der / oder dieselbe durch unsere Buͤrgermeister / und Rath Unser Statt Bonn omni appellatione, vel Reclamatione remota, dem Gemeinen Nutz zu gut / auch des Vatterlandts Gedeyen / und Wohlfahrt ohnverzuͤglich zu befuͤrderen / darzu angehalten und gezwungen werden;

Es soll aber einem jeden Officianten bey seinem Aydt hiemit eingebunden sein / alle / und jede Rhenten / und Gefaͤlle / Geldere / und Zinnsen zu seinem anbefohlenem Ambt gehoͤrig / bey seinem Empfang klarlich / und richtig einzubringen / und zu specificiren / dieselbe zu rechter Zeit einzuforderen / und sonst damit zu handlen / wie bey des Rentmeisters Aydt / und Ambts ferner außgetruͤckt / und dahe einigem Officianten zu richtiger einbringung der Renthen / und Gefaͤllen in sein Ambt gehoͤrig / einiger Brieff / Siegel / oder schriftlichen Scheins / so in des Raths Archivo verwahrlich vorhanden / noͤthig were / solches soll demselben zu dem Ende durch Unsere Buͤrgermeistere / und Rath / gegen gebuͤhrliche Recognition / dasselbe widerumb zu liefferen ohnwegerlich zugestelt / und gefolgt werden.

11. Von des Statt-Schreibers Annehmung / Ambt / und Aydt.

Wan hinfuͤran ein Stattschreiber zu Bonn abstirbt / abstehet / in dem Rath / oder Gericht zum Scheffen gekohren / oder sonst seines Dienst erlassen wuͤrde / so sollen Buͤrgermeister / und Rath dieser Statt Bonn / mit Vorwissen dero Zwoͤlffter / und Gaffelen / einen anderen Frommen / Redlichen / Friedliebenden Erfahrnen Mann zu ihrem Stattschreiber anzunehmen macht haben / doch also / daß dieselbige Persohn ihres Wolhaltens / Herkommens / Erfahrenheit / und Wandels glaubwuͤrdige Zeugnus / oder Schein habe / Unserer Statt Bonn Buͤrger seye / oder ohnverzuͤglich werden koͤnne / und dan gemelten Buͤrgerlichen Aydt geschworen habe / alßdan soll er anfangs des gethanen Buͤrgerlichen Aydts erstlich erinnert / und denselben steth und fest zu halten ermahnet werden / darauff globen / und zu Gott / und seinen Heyligen Evangelien schweren / wie folgt. <27>

Daß Er dem Stattschreiber Ambt zu Bonn zu rechter gewoͤhnlicher / bestimbt- und angesetzter Zeit / Tag / und Stund / in- und außerhalb dem Rath getreulich vorstehen / und außwarten / mit auffschreiben / lesen / rechnen / und recessiren / wan nemblich nach eines jeden Officianten angehoͤrt / examinirt, justificirt, und so wohl von Buͤrgermeisteren / und Rath / alß auch den Zwoͤlffteren von der Gemeinden wegen approbirt, und angenommener Rechenschafft dieselbe von ihnen zu recessiren / vergleichen / und ihme Stattschreiberen anbefohlen worden; Deßgleichen alle andere Raths Bescheide / und Verordnungen / zu befuͤrderung der Execution, auch des Gemeinen Nutzens / und Bestens wie ihme die jederzeit im Rath befohlen worden / fleißig in des Raths Prothocoll, oder Buͤcher / ohn einige Affection, und nit anderst / dan beschlossen / schreiben / und underschreiben / auch die Buͤcher / Brieff / Urkundzettel / Rollen / Register / und anders / so in den Rath bracht worden / oder auch sonst dem Rath / und der Statt zugehoͤren / imgleichen die Rathshaͤndel / und Heimlichkeit zu Unserem und Unserer Nachkommen / Buͤrgermeister / Rath / und un­ser Statt Bonn Nachtheil / niemand offenbahren / lesen / oder le­sen lassen / sonderen biß in sein Grab verschweigen; auch kein Copey / oder Abschrifft / ohne Buͤrgermeister / und des Raths Vorwissen / und Bescheid / außhendigen / niemand rathen / oder warnen / Buͤrgermeister / und Rath in der Umfrag / Anzeigung dero bedencken / oder stimmen nit einreden / sonderen fleißig zuhoͤren / und den gemeinen Raths Beschluß / wie obgemelt / treulich / und fleißig schreiben / wohe auch der Rath ihne umb sein wohlmeintlich bedencken fragen lassen wuͤrde / dasselb kuͤrtzlich / und trewlich vermelden / kein Geschenck / noch Gab nehmen / sonderen alle und jede Documenta, Raths Buͤcher / Schein und Bescheide / wie obgemelt dem Rath / oder dero Statt zugehoͤrig / in des Raths Archivo, Kasten / oder Verwahrung fleißig auffbehalten / baussen befelch / und erlaubnus der Buͤrgermeister / nichts von dem Rathshauß tragen / oder tragen laßen / forth auch die Schluͤßel darzu gehoͤ­rig / so viel Ihme deren darzu vertrawet / oder befohlen worden / getrewlich verwahren / daß daran / oder darfuͤr keine Versaͤumnus geschehe / Uns zuvor / wie auch Buͤrgermeisteren / Rath / und Gemeinden zu Bonn jederzeit in diesem Ambt getrew / gehorsamb / und gewehrtig seyn / auch sonst alles / und jedes / so einem Frommen / Ehrbaren / Getrewen / und fleißigen Stattschreiberen / von rechts und guter Gewonheit wegen / aignet und gebuͤhret / darzu diese [G2] <28> Unsere Reformation, und Ordnung so viell / und fern dieses sein Ambt / und Person belangt / wuͤrcklich steht / vest / und unverbruͤchlich halten / und leisten solle / und wolle;

Darnach soll Er diß alles zu halten angloben / und schweren / Conceptis verbis wie folgt /

Was Mir jetzo vorgehalten / und ich mit Worten underschiedlich bericht worden bin / das will Ich also getrewlich / und gehorsamblich halten / also helffe mir GOtt / und seine Heylige Evangelia.

12. Von denen Jahr Rechnungen.

Es sollen Buͤrgermeistere und Rath Unser Statt Bonn die Sachen dahin richten / damit ins kuͤnfftig von denen Officianten alle und jede in ihr Ambt einschlagende staͤttige Renthen / Einkoͤmbsten / und Ge­faͤlle / in ihrer Einnahm specificirt, und bey jede ge­setzt werde / wan / was und wie viell darab eingangen / und noch außstehe; auch sonsten alle und jede unstaͤtig- oder extraordinari Einkombsten unter einer besonderer Rubric gleichfals mit Tag / und Jahr auffgezeichnet / und in die Einnahm gebragt werde / also daß in Zeit der Jahr-Rechnung daran kein Mangel erscheine.

Gleichmeßige Versehung / und Anordnung soll auch von Buͤrgermeisteren / und Rath geschehen / damit bey der Officianten Rechnungen alle / und jede außgaben klaͤrlich gemeldet / und dabey gesetzt werde / aus wessen befelch / warzu / und zu welcher Zeit selbe beschehen / auch alles mit seinen behoͤrigen Quitungen / und Justificationen ordentlich belegt / und also zur Zeit der Jahr-Rechnung / und deren Examination auch daran kein Mangel ge­funden / noch der Recess verhindert werde;

Item Wir ordnen / und wollen auch / daß hinfuͤran Unsere Buͤrgermeistere / Rath / und Officianten mit ihren schuͤldigen <29> Jahr-Rechnungeu / und deren außcalculirten Lateral so wohl / alß Schluß-Summen / sambt ihren numerirten Beylagen und Justificationen doppelt / und correct abgeschrieben / und revidirt, 14 Tage vor Anfang des Monats Februarij allerdings fertig seyen; gehalten auff erforderen dieselbe zusambt den Reliquis, und Designation der Restanten / alsobald / und bey Poen von 20 Goldguͤld {darvon Uns Zwey Theil / und dem Rath zu behueff des Baws Ein Dritten Theil ohnnachlaͤßg von den saͤumigen zu bezahlen} einbringen und uͤberlieferen zu koͤnnen.

Dan es sollen Buͤrgermeister / und Rath hinfuͤran Jaͤhrlichs nach umbgelauffenen halben Januarium aller Officianten Rechnungen einforderen / damit Rath / und Zwoͤlfftere zeit und weill haben dieselbe vor ihrer endlicher ablegung zu durchlesen / uͤber die befindende Errores, oder Zweiffel von denen Officianten Bericht / und Justification zu forderen / und dafern damit zur gnuͤge nit auffkommen koͤnten / solche Errores, oder Dubia auffzuzeichnen / umb also dieselbe bey erwehnter endlicher ablegung der Jahr-Rechenschafften gleich anweisen / und dieser gestalt alsolche ablegung schleunig und bestendig verrichten zu koͤnnen. Es solle aber dieselbe im beysein Unseres Ambtmans / und Unseres zur zeit aͤltisten Hoff- und Hoff-Cammer-Raths {als welche Drey hierzu / und uͤbrigen faͤllen / welche inhalts dieser Ordnung fuͤr Unseren Commissariis verrichtet werden sollen / krafft dieses in Perpetuum, jedoch erst nach geendigter / der anjetzo noch obschwebender specialer Commission / verordnet werden} fort Buͤrgermeisteren / Rath / und Zwoͤlffter / auff den Achten Tag vor Unser Lieben Frawen Lichtmessen [= 02. Februar] / des Morgens zu sieben Uhren / auffm Buͤrgerhauß angefangen / bis umb eilff / oder zwoͤlff Uhren Vormittags / und darnach die andere folgende Vor- und Nachmittaͤge bis auff gemelten Lichtmessen Abendt inclusive continuirt, und beschlossen / wie auch recessirt werden;

Damit nun auch kuͤnftighin die Statt-Rechnung zu gehoͤriger Zeit ordentlich vorgenohmen / abgehoͤrt / und recessirt, und solches / wie bis daher zu Unserem Ungnaͤdigsten Miß­fallen / und des gemeinen Wesens hoͤchsten Nachtheil vielfaͤltig geschehen / weiter nit verabsaͤumet werden moͤge /

So ordnen / und wollen Wir / daß die Zwoͤlfftere alle / und jeden Jahrs vierzehen Tag vor Lichtmessen auffm Buͤrger- [H] <30> Hauß in der Zwoͤlffter-Stuben sich versamblen / und bey ihres Mittels zu obgemelten Unseren Dreyen Commissarien {umb denenselben den Tag / und Zeit / wan die Jahr-Rechnung / vermoͤg dieser Unser Gnaͤdigster Reformation, und Policey-Ordnung / anfangen soll / anzuzeigen} deputiren / dieselbe zu erscheinung gezimmendt ersuchen / und an diese Unsere gnaͤdigste Verordnung erin­neren; Auff den fall aber die Zwoͤlfftere daran saͤumig seyn / und dadurch verursachen wuͤrden / daß die Rechnungen in bestimbtem Termino nit abgehoͤret / und recessirt wuͤrden / sollen dieselbe ihres Ambts wuͤrcklich entsetzt / und dessen nit mehr faͤhig seyn / die Gaffelen aber zusammen tretten / Newe Zwoͤlfftere erwehlen / und da solches Ein- oder ander etwa zu behinderen trachten wolte / desfalß Uns immediate umb Manutenentz / und Beystandt / unterthenigst imploriren;

Und damit Gemeine Buͤrgerschafft noch mehrers gesichert seyn moͤge / daß das gemeine Gutt / und Statt-Rhenten getrewlich verwaltet / und berechnet werden / so gestatten Wir hiemit / und in Krafft dieses gnaͤdigst / daß eine Jede Gaffel dieser Unserer Statt Bonn zu Anhoͤr- und Examinirung gemeiner Statt-Rechnungen / einen auß ihrem Mittel / so sie darzu am besten qualificirt zu seyn vermeinen wird / deputiren und abschicken moͤge / welcher auff anstehen der Gaffelen / alßdan zu solcher Anhoͤr- und Examinirung / neben denen Zwoͤlffteren ohne einige Widerre­de admittirt / und zugelaßen werden solle:

Desgleichen sollen alsobaldt nach abgelegten Particular Jahr-Rechnungen Buͤrgermeistere / und Rath / auß ihrem Em­pfang- und Außgab-Buch ihre General Jahr-Rechenschafft / was / wie viel / und zu welcher Zeit / von wegen des Raths / und der Statt / das verwichene Jahr / von den Officianten vor / und nach empfangen / und hinweder außgeben / klarlich einrichten / und was nach abzug eines von dem anderen / an dem Em­pfang / oder Außgab uͤberschiesset / deutlich hinzufuͤgen; Diesemnegst alsolche General Rechnung gleichfals in beysein obgemelter Dreyen Commissarien / Zwoͤlffter / urd Deputirten vorbringen / ablesen / und nach befundener richtigkeit am endt deroselben den Recess schreiben / und underschreiben lassen.

So sollen auch hinfuͤran alle Gefaͤlle / und Rhenten / so baldt die fallen / und von den Officianten empfangen seint / in des <31> Raths Archivum, und Renth-Kammer gelieffert werden / darzu die Zwey Buͤrgermeister jeder einen / der Renthmeister einen / und die Zwoͤlffter / von der Gemeinden wegen / auch einen Schluͤssel haben sollten / und wan / und so offt man den Renthmeisteren / oder anderen Officianten zu behueff des Raths / oder seines Ambts geldt zu geben noͤthig / sollen solche Persohnen / so die Schluͤsselen haben / mit ihren Schluͤsselen darzu gefordert werden;

Wan man deductis deducendis⁶ in Zeit der Jahr Rechnung / oder auch darnach befinden wird / daß eine solche Sumin an Geldt in Archivo vorhanden / darmit man etwo ein schuͤldiges Capital / oder Jahr-Renth ablegen kan / soll mit Rath / und in beysein Unserer Commissarien / Buͤrgermeister / Rath / und Zwoͤlffteren uͤberlegt / und geschlossen werden / was am nuͤtzlichsten abzuloͤsen / ein solches zeitlich auffgekuͤndigt / und geloͤst / auch solche abloͤsung / Außgab / und Summ in des Raths kuͤnfftige General Jahr-Rechnungen gebracht / und die geloͤste Haubtverschreibung / und Quittantz beygelegt werden: Gleicher gestalt solle es auch dar­nach / wan / und so offt eine andere dergleichen Summ sich uͤbrig befinden wird / mit Abloͤse / und Extinction der beschwerlichster Capitalien / oder Lasten gehalten werden.

Wofern uͤber allen angewendten fleiß einigen Officianten die zu ihrem Ambt bekaͤndtlich gehoͤrige Renten / Guͤlden und Gefaͤlle / auff ihr beschehenes forderen / in gebuͤhrender Zeit / und Terminen nit bezahlt / oder gehandreichet / sonderen nach beschehenem Kirchen-Rueff / und Ermahnung auffgezogen / und vorenthalten wuͤrde / so sollen Unser Ambtman / Buͤrgermeister / und Rath / Captis etiam Pignoribus⁷, dem / oder denen Officianten furderlich zur bezahlung zu helffen hiemit befelch haben.

Item es sollen auch alle / und jede Officianten / sonderlich aber Renthmeister zur Zeit dahin gedencken / daß sich mit ihrem einforderen also richtig halten / und schicken / wan / und so baldt ihme / oder auch den anderen Officianten eine / oder mehr ansehentliche Summen der Raths-Gefaͤllen gelieffert / daß solche Gelder nirgent anderst / als in des Raths Gewoͤlb / oder Archivum gelieffert / und in des Raths Empfang-Buch eingeschrieben werden / wie ferner davor in Juramentorum Formulis Dispositio, und meldung geschicht. [H2] <32>

13. Von Jahr-Rechnungen deren Pfarr-Kirchen / Hospital, Hauß-Armen / Heyl: Geists und Leprosen / auch Minder-Jähriger Renthen / und Gefällen.

Ob zwar bey Eingangs erwehnter im Jahr 1582 vorgenohmener Ernewerung dieser Policey-Ordnung wohl vorsehen / und befohlen worden / daß der Pfarr-Kirchen / Hospital / Hauß-Armen / Heyligen Geists⁸ / und Leprosen Renten / und Gefaͤlle / mit denen Statt Gefaͤllen nit vermischt / sonderen ein jedes / dahin es gehoͤrt / berech­net werden solle /

So wollen Wir demnach zu mehrerer derenselben Sicher- und Verhuͤtung aller Confusion mit denen Statt-Renten / hiemit gnaͤdigst / und ernstlich / daß die Auffsicht / und Ver­waltung derenselben hinfuͤhro nit mehr bey dem Statt-Rath / sonderen nach Publication dieses denen Zeitlichen Vier Buͤrgermeisteren {welche krafft dieses zu Ewigen Kirchen-Meisteren / und Pro­visoren angeordnet werden} hiemit gnaͤdigst / und ohne einige dependentz vom Statt-Rath auffgetragen / und allerdings anvertrawet seyn sollen.

Diese Vier Kirchenmeistere sollen sich vor allem fleißigst angelegen seyn laßen / damit ihnen das Kirchen Rent-Buch alsobaldt außgelieffert / und uͤber bis daherigen Statum Kirchen Capitalien / und Renthen / sambt deren Einnamb / und Außgab / eine genawe Rechnung / und Anweisung gegeben / und was an allsolchem Kirchen Renth-Buch / und Statu fuͤr Mangel / und Unrichtigkeit sich finden wuͤrde / besten fleiß ersetzet werde;

Diesemnegst sollen sie alsolches Renth-Buch / und Statum dem aͤltisten Scheffen Buͤrgermeistern zustellen / und selbigem die Einnamb / und Außgab deren Kirchen Renthen auf zwey Jahr lang anvertrawen / welcher dieselbe alßdan alles moͤglichsten fleiß / und Trewe / umbsonst / und GOtt zu Ehren also verrichten solle / damit Er zu endt des Jahrs daruͤber richtige / und genawe Rechnung <33> geben koͤnne; Es solle dannoch demselben sich eines Emonitoris umb eine zimbliche belohnung zu bedienen unbenohmen seyn.

Nach umblauff aber solcher zweyer Jahren / soll besagtes Rechen-Buch / und Status sambt der Einnamb / und Auß­gab / dem anderen Scheffen / und so forth den uͤbrigen bey­den Buͤrgermeisteren bis wieder zum aͤltisten Scheffen Buͤrgermeisteren uͤbertragen / und anvertrawet werden;

Die Jaͤhrliche Rechnung aber solle jeden Jahrs in den letzteren acht Tagen des Monats Februarii, in des Zeitlichen Pastoren Behausung vor demselben / und uͤbrigen dreyen Kirchenmeisteren / so dan mehrgemelten Unseren dreyen Commissarien / auff sicheren von denselben bestimmendem Tag / mit Zuziehung Zwey / oder Dreyer von Ihnen darzu außsehender Meist-Beerbten Pfarr-Genossen abgelegt / und fleißig examinirt, zu dem Ende aber die ablegende Rechnung mundirt / einem Zeitlichem Pastori inner den er­sten acht Tagen des Monats Februarii zugestelt werden / umb sel­bige vorhin revidiren / und zu selbigem End erwehnten Commissarien / und uͤbrigen Kirchen-Meisteren nach einander zustellen zu koͤnnen / bey dem Recess aber solle das jenig / was Ihme rechnen­den Kirchen-Meisteren Jaͤhrlichs zum guten / oder auch bey dem­selben in Reliquo verbleibt / klar gemeldet werden.

Verwaltung / Auffsicht / Einnamb / Außgab / und Berechnung des Hospitals / Hauß-Armen / Heyligen Geists / und Leprosen Renthen / soll zwar die Erwehlung eines Provisors und Verwalters bey Buͤrgermeister / und Rath / jedoch dergestalt / verbleiben / daß gleichfals zu allen zweyen Jahren Einer von best be­mittelten / untadelhafften Buͤrgeren zum Newen Provisoren / und Verwalteren jedes Orths angesetzt / und derselb alle Jahr im Mo­nat Februario so wohl vor Dreyen von denen Zunfften / {und zwar nechstkuͤnfftiges erstemahl von denen Dreyen Ersten / und so forth den andere Zunfften} alß auch Dreyen auß dem Statt-Rath darzu Deputirenden / auff einen von jetzt gemelten letzteren acht Tagen des Februarii bestimmenden Tag abgelegt / und damit selbige desto besser examinirt werden koͤnne / inner den ersten acht Tagen besagten Februarii / sowohl einem auß den Zunfften / als des Statt-Raths Deputatis mundirt zugestelt / und sonsten / darmit gleichs mit der Kirchen-Rechnung gehalten / absonderlich aber bey ablegung sowohl jetztgemelter als Hospitals / Hauß-Armen / Heyligen <34> Geists / und Leprosen Rechnungen auff die jenige Renthen / welche ungangbar worden / alles fleißes acht geben / und dahin gedacht werden / wie selbige wider recuperirt, und gangbahr ge­macht werden moͤgen / was aber sich dabey befinden wuͤrde / von Capitalien abgelegt / oder sonsten einkommen / oder auch von den jaͤhrlichen Renthen entuͤbrigt zu seyn / daß ein solches nicht muͤßig liegen bleibe / sonderen mit wissen Buͤrgermeister und Rath / wie auch der Zwoͤlffter an sichere Oerther in der Statt / oder dem Ambt gegen gnugsame Underpfaͤndt angelegt / Brieff und Siegel / retentis Copiis in des Raths Archivum oder Verwahrsamb mit der Jahr-Rechenschafft gelegt / und gebracht werden;

Neben dem wollen / und ordnen Wir / daß hinfuͤran in der nechsten Wochen post trium Regum⁹ alle Vormuͤnder / Tutoren / und Curatoren der Unmuͤndigen Kinder Unserer Statt Bonn / und gantze Buͤrgerschafft gehoͤrig / vor Unserem Ambtman / Vogt / und dreyen Scheffen Unseres Hohen Ge­richts klare Rechnung thun / und was auffstehet / mit Vorwissen gedachten Unseres Ambtmans / Vogts / und Hohen Gerichts ge­gen gewisse Versicherung anlegen / auch Ihnen den Curatoren nach abgehoͤrter Rechnung daruͤber Recess / und Abscheidt gegeben werden solle;

Zu befuͤrderung dieser nothwendiger Sachen ordnen / und wol­len Wir / daß alle / und jede obgemelte Raths / und andere Gerichts-Persohnen / desgleichen alle / und jede Unsere Buͤrgere zu Bonn / ihre Zinnß / und Gefaͤlle / so sie Jaͤhrlichs fuͤr Ihre Personen / von Ihren Guͤteren / dem Hospital, der Kirchen / den Leprosen, den Hauß-Armen / lauth dero Rechnung- und Ord­nungen schuͤldig / in rechter gebuͤhrlicher Zeit eines jeden Jahrs / bey Poen der Pfaͤndung / baar erlegen / und abbezahlen / und der / oder diejenige / so daran saͤumig befunden werden / sollen nach Verlauff derselbigen Zeit / doch 14 Tag darnach unbefahrt / demnegst aber unverzuͤglich darfuͤr nicht allein gepfaͤndt / sonderen auch 6 Rader-Albus pro poena denen Hauß-Armen / und ihren Provi­soren, ohnnachlaͤßig zu bezahlen / verwirckt haben / und darzu angehalten werden;

Diesemnach setzen / und ordnen Wir / wofern bey den angedeuteten Jahr-Rechnungen uͤber allen angewandten Fleiß einige Gebrechen oder Irrung / so durch vorgemelte hierzu <35> gehoͤrge Persohnen der billigkeit nach / nicht verglichen werden koͤnten / erscheinen / daß solche Irrungen zu entscheiden / Uns und unseren Nachkommen alß dem Landtsfuͤrsten vorbehalten seyn sollen / etc.

14. Von denen Zusammenkombsten / und Unkösten

Obzwaren nicht unbillig / daß diejenige / welche der Gemeinden dienen / und derselben Nutzen / und Be­stes mit befuͤrderen helffen / dagegen auch einige Ergetzlichkeit geniessen / so ist gleichwohl ebenermassen gantz billig / daß zwischen den vorherigen guten / und der jetzigen Zeit / da Unsere Statt Bonn / und deren Einwoͤhnere / durch die im Jahr 1689 vergangene grausame Bombardirung / und biß hieher noch immer anhaltende schwere Kriegsleuffen leider auff den Grund ruinirt {des noch mehr angewachsenen Schulden Lasts zu schweigen} ein Underscheidt gemacht werde / so ordnen / und wollen Wir / daß von nun an / und kuͤnfftig hin {jedoch biß auff anderweite Unsere gnaͤdigste beliebige Verordnung} die vor diesem auff die Taͤg / und Zeit / als lang die Auffnamb der Statt Jahr-Rechnungen gehaltene Mahlzeiten {wobey / wan auch denen Gaffelen erlaubt / neben den Zwoͤlffteren jemanden ihres mitttels darzu zu deputiren uͤber 40 Persohnen sich einfinden / und ein sehr grosses consumiren wuͤrden} gaͤntzlich abgestelt seyn / hergegen aber denen darbey erscheinenden gehoͤrigen deputirten / Buͤrgermeisteren / Rath / Zwoͤlffteren / und Officianten von obberuͤrten Taͤgen / derenselben respective Ordinari Rathgangs / und sonst gewoͤhnliche Praͤsentz auß Gemeinen des Raths / und Stat-Mittelen gehandreicht / so dan nach dem Schluß der Statt Rechnungen Buͤrgermeistere / und gesambte Raths-Freunde mit einer maͤßigen Mahlzeit {wobey auch unsere bey der Auffnahm unentgeltlich erscheinende Commissarii sich mit einfinden moͤgen} auff gemeiner des Raths / und Statt Unkoͤsten von dem Rent-Meisteren tractirt werden sollen;

Wie auch auff New Jahrs-Tag / wan die New erwehlte Buͤrgermeister / Raths-Persohnen / und andere Officianten publicirt, soll pro jucundo Introitu Ihnen / zum Gluͤcklichen <36> Eingang erlaubt / und in der kuͤnfftiger Jahrs-Rechnung ein ehrlich doch maͤßiges Buͤrgermeister / und Raths-Essen des­selben Mittags auff dem Buͤrger-Hauß in Beysein Unserer Commissarien / auch des Raths Officianten / und deren Zwoͤlffteren / auff des Raths / auch Gemeinden Koͤsten auch gutt gethan / und passirt werden.

Dargegen aber ist Unser Ernstlicher Befelch / daß alle andere hiebevoren etwan eingefuͤhrte Raths / Rentmeisters / oder anderer Officianten Essen / und Zusammenkunfften / auch alle andere Außgaben / so an Opffer-Geldt / Meytranck / auf St. Martin / Ascher-Mittwoch / und soͤnsten bis hieher aus Gemeiner Cassa mißbraͤuchig geschehen / in der Jahr-Rechnung nit passirt werden / sonderen hiemit gaͤntzlich verbotten seyn sollen.

Damit aber die procession auff Unser lieben Frawen Liechtmessen solemniter gehalten / dem gemeinen Mann / und Buͤrgeren gut Exempel zur Andacht gegeben werde / so soll dem Ambtman / Vogt / und jedem Buͤrgermeister ein Pfuͤndige Wachs Kertzen / einem jeden Raths Verwandten ein drey Viertel Pfund schwer / und einem jeden Zwoͤlffteren / wan sie mit der Procession auß- und eingehen / auch biß zum Endt der H[eiligen] Meeß / wie sich gebuͤhrt / in der Pfarr-Kirchen bleiben / ein halb Pfuͤndige Wachs Kertzen gegeben / und solches den Officianten in seiner Jahr-Rechnung passirt werden;

Wan auch Unser Ambtman / Vogt / und Buͤrgermeister / Scheffen / Rath / und Zwoͤlffter der Gottes-Tracht vom Anfang bis zum Endt beywohnen / soll man die Raths­-Zeichen jedem geben / wie von Alters braͤuchlich / und Herkom­mens ist;

Dieweil auch von Alters uͤblich hergebracht / daß Unsere Buͤrgermeister / und Raths-Verwandte auff unseren hohen und Herren Gedings-Taͤgen sich auff dem Rath-Hauß pflegen zusammen zu thuen / und von der Statt Gerechtigkeit / und anderen Nothwendigkeiten zu tractiren / und d[a bei] solcher Zusammenkunfft etwas vorgefallen / so zu fragen gewesen / Unserem Vogt / und Scheffen durch Deputirte anbringen zu laßen / so laßen Wir Uns nit mißfallen / sonderen wollen / daß solcher Brauch hinfuͤhro <37> also gehalten / Buͤrgermeister / und Rath / die von Alters gewoͤhnliche Praesentzen / jedem 6 Alb[us] gegeben / und in der Rechnung passiret werde;

15. Von der Statt Baw und Gemeinem Vorrath.

Wan auch hernechst zu behueff der Statt / und gemeiner Buͤrgerschafft / auff gut befinden Unserer Buͤr­germeister / Rath / und Zwoͤlffter ein Baw angefangen / eine merckliche Quantitaͤt von Roggen / Wein / Kalck / Baw-Holtz / oder ein Ziegel-Ofen mit Gemeinem Geldt bestelt / und eingekaufft wuͤrde / so sollen auch darzu sowohl auß dem Rath / als den Zwoͤlffteren geordnet werden / solchen Vorrath zu empfangen / zu verwahren / und darauff zu sehen / daß damit trewlich zu gemeinem Nutz umbgangrn / und jedes Jahrs gehoͤrendt verrechnet werde.

16. Von Anschlag / Auffbringung / Reichs-Hülff / Brandt-Schatzungen / Landt-Stewr / und anderer Beschwernus.

So soll auch hinfuͤhro in Nahmen Unserer Buͤrgermeisteren / Rath /Zwoͤlffteren / und Gemeiner Buͤrgerschafft zu Bonn / kein Geldt auff Pension, und In­teresse, ohne Unser / Buͤrgermeister / Rath / und Zwoͤlffter Wissen und Willen / so darzu nothwendig erfordert werden solle / auffgenohmen / noch daruͤber Brieff auffgerichtet / und versiegelt werden / bey Vermeidung unserer Andtung / und scharpfen Einsehens.

Zu dem ordnen Wir / daß Unserer Buͤrgermeister / Raths / und Unserer Statt Bonn groß Insigel ad Causas genandt / auff dem Buͤrger-Hauß in des Raths Archivo / und darzu sonderlich verordneter Kisten mit fuͤnff Schloͤsseren bewahrt / und [K] <38> versorgt seyn / darzu ein jeder Buͤrgermeister einen / der aͤltiste Scheffen Unseres Hohen Gerichts / so des Raths ist / einen / und die Zwoͤlffter / von der Gemeinden wegen / einen sonderlichen Schluͤssel haben / auch solch Siegel zu einigen Contracten / und Verschreibungen nit gebrauchen / anhangen / oder truͤcken sollen / es haben dan die Buͤrgermeister / Rath / und Zwoͤlffter sich zuvor mit den Partheyen / so ihnen Geldt außthuen woͤllen / des Contracts halber verglichen / und darnach solchen ContractsConcept, oder Verschreibung zuvor / in versambletem Rath / und beysein Unseres Ambtmans / und Zwoͤlffteren / gelesen / examinirt, und eintraͤchtig verwilligt / auch die Solemnitates, so sonst die Gemeine Geschriebene Rechten hierzu erforderen / gaͤntzlich observirt / adhibirt / und gehalten.

Neben dem haben Wir auß sonderlichen Uns darzu bewegen­den Ursachen geordnet / wollen / und ordnen auch hiemit / wan hinfuͤhro Reichs- oder Landt-Stewren im Heyl: Roͤmischen Reich / oder auch in Unserem Ertz-Stifft bewilligt / daß alßdan Buͤrgermeister / Scheffen / Rath / und Gemeinde Unserer Statt Bonn solche Stewren auff alle Guͤter / so in- oder aus­serhalb der Statt in der Buͤrgerschafft gelegen / forth alle ande­re Haab und Guͤtere / auch Gewinn / und Gewerb legen / durchgehendts billiche Gleichheit halten / und die Armen uͤber Gebuͤhr nit beschweren; Demnegst ein jeder so in Unser Statt / und Buͤrgerschafft zu Bonn wohnet / oder sonst Buͤrger / und Ge­schoß Guͤter hat / niemand außgescheiden / sein Contingent zu rechter Zeit entrichten / und bezahlen.

17. Von der Bürger Wacht.

Dieweil Uns / Unserem Ertz-Stifft / Buͤrgermeister / Rath / und gemeiner Buͤrgerschafft / fort einem je­dem / so in dieser Unsrer Statt wohnet / zu denen Zeiten / wan Wir kein gnugsahme Militz / und Besa­tzung in der Statt haben / sonders viel darahn ge­legen / daß die kleine / und große Pforten / Thuͤrn / Wachthaͤußer / Chur-Schaw und Schildtwachten / so wohl auff den Thuͤrnen / alß auch in den Gaßen am Rath-Hauß / auff der Stattmauren / <39> Abents / und Morgens behutsamb / und zu rechter Zeit / auff- und zugeschlossen / besetzt / auff- und abziehen / und auff solches alles durch die darzu auß dem Rath / und auß den Zwoͤlffteren / oder auch der gemeinen Buͤrgerschafft jedes Jahr erwehlte / und verordnete Wachtmeistere / fleissige und getrewe Achtung geben werde / die Buͤrgermeistere / Rath / und gemeine Buͤrgerschafft auch willig / dafern mit dem bißhero darzu bewilligtem Jahrlichen Wacht-Geldt fleißige / trewe Waͤchter zu bestellen / und zu behalten / nit zureichen koͤnten / derentwegen zuelaͤngliche Erhoͤhung zu erleiden / und zu willigen;

So verordnen / und wollen Wir / daß hinfuͤro ein jeder Buͤrger / alle / und jedes Jahr zu den Zweyen Quater Temporen, ohne Verzug / fuͤr sein Wacht-Geldt dem verordnetem Wachtmeister handtreichen / und bezahlen solle 6 Albus / zu den anderen zwey­en nachfolgenden Quater Temporen gleichfals 6 Albus / so macht das gantze Jahr einem jeden Buͤrger 12 Albus current.

So viel die unvermoͤgende Wittiben belanget / sollen selbige bey der halbscheidt gelassen werden;

Welcher heran saͤumig / sich dessen weigeren / und widersetzen wuͤrde / der soll alsdan doppelt zu zahlen schuͤldig seyn / und auff Anruffen / der Wachtmeisteren durch die Buͤrgermeistere darzu angehalten werden;

Auß diesem der Buͤrger Wacht-Geldt sollen mit Rath / und Verordnung Burgermeister / und Rath die Erwehlte Wachtmeistere bestellen / annehmen / und belohnen / zwey Getrewe / fleißige Waͤchter ausser St. Remigii Thurn / die Vor- und nach Mit­ternacht fleißige Wacht zu halten / und so offt / als die Uhr im Munster schlagt / die Stund mit dem Wachthorn zu vermelden / auch so offt sie von den Buͤrgermeisteren / Wachtmeister- oder an­deren Waͤchteren / und Buͤrgeren / in Fewrs Noth / und Gefahr angeruffen werden / richtig Bescheidt zu geben / von St. Michaels Tag an des Abents zu 7 Uhren biß zu 12 Uhren der Erste / der An­der aber von 12 biß den Morgen zu 6 Uhren biß zum Heyligen Osterfest exclusive zu wachen / und zu blasen schuldig seyn sollen.

Gleicher Gestalt sollen die nechstgemelte zwey Thurn- oder Chur-Waͤchtere von dem H. Oster-Tag an / biß zu St. Michels Tag des Abents von 9 biß 12 Uhren / und darnach von 12 biß des Morgens zu 4 Uhren wachen / und blasen. <40>

Desgleichen die Tagwacht auch umb einander zu halten / und zu versehen / was sie in- oder außerhalb der Statt von Brandt / oder anderer Gefahr vernehmen / hoͤren / oder sehen / ohnverzuͤglich / so wohl des Nachts / als beym Tag mit dem Horn / außwendigen Brandt mit Außhangung einer Laternen / inwendigen Brandt aber mit Anziehung / oder Schlagung der Brandt-Gloggen an­zuzeigen schuͤldig seyn.

Ferner sollen auch hinfuͤhro in Unser Statt Bonn von Buͤrgermeister / und Rath {wan Wir keine Guarnison in der Statt halten / und also durch selbige keine Patrolle gegan­gen wuͤrde} zu der Nachts-Wacht Vier bescheidene fleißige Buͤr­ger / und Waͤchter verordnet / und aus obgemeltcm Wacht-Geldt belohnet werden / welche durch die Gassen gehen / Patrolliren / und wan sie einige Fewrs Gefahr / Noth / Schlaͤgerey / oder Auffruhr hoͤren / sehen / oder vermercken / solches alsobald den Buͤrgermeisteren / und anderen Scharwaͤchteren / und Buͤrgeren / so vor- oder under dem Rath Hauß / oder anderer Orthen die Wacht haben / anzeigen / und sollen von vorgemelten Vier Waͤchteren jedes Abendts Zwey vor Mitternacht / und Zwey nach Mitternacht / die Uhr / und stundt blasen / und ruffen / der Eine mit dem Wacht-Horn der ander mit ruffender Stimm / und solches so viele Stunden langh / alß wie nach underscheidt der Jahrs Zeit obgemelt ist / auch alle / und eines jeden Abendts vor- und nach Mitternacht von den Wachtmeisteren ohnversehens visitirt werden;

Desgleichen sollen hinfuͤhro alle / und jede Abendt / wan die Passanten und reisende Gaͤste ankommen / von allen / und jeden Wirthen / und Gasthalteren deren frembden Gaͤsten Nahmen / und Zunahmen auffschreiben / uud selbige Unserem in der Regierung stehendem Gelehrten Buͤrgermeistern / zugeschickt werden / und dahe man befaͤnde / daß ein starcke Anzahl frembder Passanten / einkommen waͤre / solle der Buͤrgermeister solches Unserem Gubernatoren / und Commendanten zu wißen thun / und den verordneten Schar-Waͤchteren / so under dem Rath-Hauß / oder sonsten anderen darzu bestimbten Platzen die Wacht haben / noch etliche Buͤrger nach Gelegenheit des einkommenden Volcks zuesetzen; und die NachtsWacht desto fleißiger die Gassen durchzugehen / und zu visitiren erinneren laßen; <41> Dahe aber {welches Gott gnaͤdiglich verhuͤten wolle} eine Fewrs-Brunst / Auffruhr / oder Lermen angienge / durch die Waͤchtere die Brandt- oder Gewalt-Klock gezogen / geleutet / und die gemeine Buͤrgerschafft / zur Huͤlff / und Wehr gefordert werden muͤsten / soll man sich Brand- und Lermen-Ordnung {so Wir mit Rath / und zuthuen unserer Ambtleuthe / Rath / und anderer verstaͤndigen Unserer Buͤrgermeister / Rath / und Gemeinde stellen laßen wollen} gemeß halten;

Die jenige / so zum Fewr / und der Wehr verordnet / sollen sich daselbst / die andere so auff Pforten / Mauren / und anderen Plaͤtzen vero[r]dnet / aldahe finden / und deßfahls wie ihnen gebuͤhrt / ein jeder seinem Befelch / und Ordnung mit trewem ohnerschrockenem Gemuͤth abwahrten / und sich Maͤnnlich erzeigen in kein Vergeß stellen.

Damit nun solche Wachtmeister / und Waͤchtere ihrer Muͤhe / und Arbeith einige Belohnung / und Ergetzlichkeit haben / soll durch Buͤrgermeistere / Rath / und Zwoͤlfftere das Buͤrger-Buch / und Wachtgeldts Register mit allem fleiß besichtiget / und obgemelter Erhoͤhung des Wachtgeldts nach / einem jedem obbesagten Waͤchteren gebuͤhrende Belohnung gemacht / und in rech­ter Zeit bezahlt / und entrichtet werden;

Fuͤnde man aber einigen Waͤchter unfleißig / und saͤumig / sollen die Wachtmeister das erstemahl ein Orth eines currenten Gulden / das andermahl einen halben Gulden current, das drittemahl aber einen Gulden gantz an seiner Belohnung abziehen / wo er sich dan nit besserte / sonderen zum viertenmahl strafflich befunden wuͤrde / solle man ihne bey Sonnenschein im Buͤrgerliche Custodien weisen / und daselbst solchen seinen Unfleiß mit Waßer / und Brodt buͤßen / und abtragen laßen / auch einen anderen fleißigeren an seine statt zu verordnen / und anzunehmen macht haben /

Damit auch diese Unsere Statt Bonn / und Buͤrgerliche Haͤußer in gutem Baw / und Weßen erhalten / und den Buͤrgeren / und anderen / so Uns Unserem Ertz-Stifft / und der Statt in Nothfaͤllen woll geruͤst zu ziehen / denen / auch die Wacht / wohe noͤthig darauß versehen / und das schuldige Wachtgeldt Jaͤhrlichs davon gegeben werde / So ordtnen / und wollen <42> Wir / daß Unsere Maͤyer / Buͤrgermeister / und Rath / sambt den Zwoͤlffteren Jahrlichs 2 oder 3 mahlen in der Statt umbgehen / die Mißbaͤw / und verfallene Haͤuser / und Hoff-Staͤtte besichti­gen / und in Verzeichnus bringen / die Herren / und Einwohnere derselbigen Unserentwegen ernstlich ermahnen / endtlich Zeit / und Ziehl setzen sollen / solchen Mißbaw / und Ruin wider zu gebuͤhrlichem Baw innerhalb drey Jahren nach der ermahnung zu brin­gen / und der Statt davon das gebuͤhrende Wacht-Geldt zu gehoͤ­render Zeit entweder zu bezahlen / und zu handtreichen / oder aber zu sehen / und zu hoͤren / daß solche Platz / und Hoff-Statt anderen zu bebawen / und das Wacht-Geldt darvon zu bezahlen eingeraumbt werde; Wan dan nach solcher Ermahnung die drey Jahr verlauffen / und Buͤrgermeistern / und Rath das Wacht-Geld darvon nit entrichtet / auch die Hoff-Staͤtte nicht wider auffgebawet worden / sollen Buͤrgermeistere und Rath / jetzo alß dan / und dan als jetzo / solche Ruinosas Areas einziehen / und zu behueff der Statt plus Offerenti zu bebawen / und daraus das Jaͤhrliche Wacht-Geldt der Statt zu bezahlen uͤberlaßen; durch Unsere Maͤyer aber die Execution verrichtet werden;

Wohe sich aber begebe / daß man zu abzahlung der obgemelter nothduͤrfftger Wacht-Gelder / mit dem besagter maßen erhoͤhetem Buͤrgerlichem Wacht-Geldt nit zukommen koͤnte / so sollen Buͤrgermeistere / Rath / und Zwoͤlfftere biß zu voͤllger bezahlung der Wachter belohnung das Buͤrgerlich Jaͤhr­lich Wacht-Geldt biß auff 14 oder 16 Alb. Cuͤrrent zu verhoͤhen macht haben;

Dahe man dan hernechst befinden wuͤrde / daß von dem erhoͤhtem Buͤrgerlichem Wacht-Geldt etwas uͤberschießen wuͤrde / soll in des Raths Archivum gelieffert / auffgeschrieben / und zu behueff des Gemeinen Nutzens gebraucht / und in der Jahr-Rechenschafft eingebracht / und verzeichnet werden. <43>

18. Von etlichen Gefällen / so der Statt zum Guten auffs newe verordnet / und jährlichs nach gemelter gestalt fallen sollen.

Damit nun gemelte Unsere Statt Bonn auß dem mercklichen Schulden Last mit der Zeit geholffen / [er]traͤgliche Mittel und Weege / so darzu dienstlich / nit umbgangen / sonderen gebraucht / und angestelt werden / und sich dan befindt / daß Unsere Statt Bonn vor der Pforten / in der Buͤrgerschafft eine zimbliche gute Kuͤhe-Weide hat / so aber bey diesen Kriegs-Zeiten verpfaͤndet; So lassen Wir es bey der alter Ordnung dergestalt bewenden / daß nach einloͤs- oder befreyung solcher Weiden biß zu Unserer Widerruffung / und laͤnger nit / ein jeder Buͤrger / und Buͤrgerin zu Bonn / von einer jeden Kuhe / so auff solche gemeine Weide getrieben wird / dem Rath / und dessen Renthmeisteren alle / und jedes Jahrs hinfuͤhro geben nnd handtreichen sollen 16 Albus¹⁰ / und von einem Rindt 8 Albus currenter Muͤntz / und auff St. Michaels gewißlich / und unweigerlich bey Poen der Pfaͤndung bezahlen soll.

Und auff daß dieß also richtig / und gewiß dem Rath / ohne betrug / behandtreichet werde / so soll ein jeder Buͤrger / und Buͤrgerin auff Maͤy-Tag / oder wannehr man sonst darfur / oder darnach die Kuͤhe in die gemeine Weyde treibt / sich bey den Rentmeisteren / und seinem zugeordtnetem Baumeisteren / in beyseyn des Statt-Schreibers zur Zeit verfuͤgen / und wie viel Kuͤhe Er / oder sie in die Gemeine Weyde dieß Jahr treiben wol­len / oder treiben / bey seinem / oder ihrem Aydt behalten / und ins Register schreiben laßen.

Es soll auch der Kuhehirt bey seinem Aydt verstrickt werden / kein Kuͤhe / oder Rinder under die Hert / in die Weide zu treiben / sie seyen dan zuvor eingeschrieben / und ihnen ein Warzeichen gebracht;

Es soll auch der Renthmeister allen Buͤrgeren / und Buͤrgerinnen solch Geldt auff St. Michaels Tag¹¹ zu liefferen zehen [L2] <44> Tag zuvorn in der Kirchen / und auff den Gaffelen verkuͤndigen / und ansagen laßen / dasselbe empfangen / in seinen Empfang / folgents in die Außgabe seiner Jahr-Rechenschafft denen Buͤrgermeisteren / und Rath / in das Archivium, lauth dieser Ordnung / liefferen / und die Saͤumige mit der Pfaͤndung und Umbschlag derselben / ohne laͤngeren Verzug / anhalten / auch an seinen Fleiß nit mangelen laßen.

Desgleichen / wan / und was Zeit hernegst in- oder außerhalb Unser Statt Bonn / und der Buͤrgerschafft einige Unbeweglich Erb-Gut / oder Renth Erblich / und abloͤsig verkaufft wird / So wollen / und ordnen Wir hiemit / daß den Buͤrgermeisteren / Rath / und Gemeinden Unser Statt Bonn / biß zu Unser / und Unser Nachkommen Widerruffung von jedem Hundert Reichsthaler Kauff- oder Contracts-Geldt ein Thaler / durch den Kaͤuffer bezahlt / und gegeben werden solle.

Es sollen auch Unsers Hohen Gerichts Scheffen / und Schreiber hinfuͤhro die Summam des Kauffs oder Contract-Geldts in specie berichten / auch des Raths verordneten Renthmeisteren darab verstendigen laßen / und keine Erbung empfangen / oder einschreiben / der Kaͤuffer habe dan zuvor von Buͤrgermeister / und Rath Unser Statt Bonn / oder dem Renthmeisteren glaubwuͤrdige Quitantz dargelegt / das alles richtig gemacht / und bezahlt seye.

Wofern auch ein Außwendiger einig Unbewegliche Erb-Guͤter in Bonn / oder der Buͤrgerschaft district verkauffen / und das Kauff-Geldt aus dem Ertz-Stifft in eines anderen Herren Landt führen wolle / solle Er darvon Unserer Statt Bonn Buͤrgermeisteren / Rath / und Renth-Meisteren gegen gebuͤhrliche Quitantz bis zu Unserer Widerruffung den Zehenten Pfening geben / und anziehen laßen / ehe / und zuvor Ihme einig Geldt gefolgt / und dem Kaͤuffer die Erbung geschehe. <45>

19. Von Ordnung der Statt Bonn Accinsen12 ins Gemein / und wie die hinfürter sollen eingenommen werden.

Ferner / damit hinfuͤro dieser Unser Statt Bonn / wie obgemelt / nit allein auß dem beschwerlichen Verlauff / und Schulden Last / sondern auch zu Besserung / und Reparation des Baws an Thuͤrn / Mauren / Pfor­ten / Graben / und anderer nothwendiger Munition, weiter geholffen / die darzu von Unseren Herren Vorfahren Ihnen eingeraumbte Accins / und andere Jaͤhrliche Gefaͤlle / durch trew gehorsamen Fleiß / richtige Einforderung / Außgabe / und rechte Oeconomie, wider in vorigen / und besseren Standt gesetzt werden moͤge; So ist Unser Gnaͤdigst- und ernstlicher Will / und Befelch hiemit / daß auff diese nachfolgende Ordnung / auff Maß / und Zeit / wie hernach beschrieben folgt / biß zu Unser / oder Unserer Nachkommen Widerruffung / steiff / vest / und un­verbruͤchlich gehalten / und davon im geringsten nicht abgewichen werde.

20. Ordnung der Statt Bonn. Wein Accins.

Erstlich setzen / ordnen / und wollen Wir / daß die Wein-Accins sowohl / als alle andere / hinfuͤro nicht mehr verpfachtet / sonderen gleiche bey Eingang annoch lauffenden Jahrs wuͤrcklich Zwey Accins-Meistere angeordnet / also forth durch dieselbe / und nach deren Toͤdtlich oder anderen Abgang / andere Zween Ehrbahre Buͤrger / so nit des Raths / noch Zwoͤlfftere / eingenohmen werden sollen; Gestalten selbe bey ihren Ayden / damit sie sonderlich zu beladen / auch verpfaͤndung ihrer Haab / und Guͤter / vermoͤg / und nach lauth dieser Ordnung / getrewlich / und fleißig zu bedienen.[M] <46>

Zum Zweyten / welcher sich des Weinzapffens mit Offenem Wisch¹³ / oder sonst der Weinhandthierung mit dem Glaß alhier Unser Statt Bonn gebrauchen wolte / soll zuvor daselbst ein veraydter Buͤrger seyn / und fuͤr 100 Goldtgl. werth eigen Erbschaft im Boͤnner Bahn haben {daruͤber sich die Zinß-Meistere mit Fleiß zur Zeit erkuͤndigen sollen} ehe und zuvor Ihnen vorgeschriebenermassen zu zapffen / oder mit dem Glaß zu verkauffen / erlaubt werde / jedoch soll / jederem Buͤrgeren frey stehen / sein eigenes Gewaͤchs mit dem Wisch zu verzapffen / Er seye gleich obernehmtermassen im Boͤnner Bahn geerbt / oder nicht.

Zum Dritten / soll kein Buͤrger seinen Wisch außstechen / noch zum feilen Kauf zapffen noch auch Wein-Kauffmanschafft mit dem Glaß treiben / Er habe dan zuvor vom Rath zu Behueff der Statt 12 Goldtg[u]l[den] erlegt / auch bey den Zinß-Meisteren zur Zeit wegen des Zapffens Erlaubnus begehrt / und erhalten;

Item wan Er dieser Gestalt Erlaubnus begehrt / sollen die Zinßmeistere alsbalb die Faß besichtigen / und im Fall auch einer 2 Faß zapffen wolte / soll er zum zweyten / und abermahl sich bey den Zinß-Meisteren angeben / und ihnen solches vermelden, / ehe / und bevor er macht habe darmit fort zu schreiten.

Item soll kein Buͤrger Wein zum feilen Kauff anstechen / noch oͤffentlich mit dem Wisch verzapffen / oder auch die Weinzinßmeistere keinem darzu erlauben / Er habe dan das Faß / mit Wein / so er den Zinßmeisteren wuͤrde zeigen / zuvor durch einen veraͤydten Statt-Roͤder¹⁴ stechen / und ritzen lassen.

Es soll auch kein Buͤrger auff einmahlen mehr zu zapffen macht haben als vier Boͤdden / daß ist / zwey Faß / darneben soll auch kein Buͤrger im Zapffen steigeren / noch seinen Wisch abwerffen / ober abthun / ehe / und zuvor das Faß / so Er zu zapffen angefangen / außgezapfft / und ledig / es werde dan Sach / daß die Zinßmeistere mit Zuthun beyder Buͤrgermeister erkennen koͤn­ten / daß durch Vielheit gemeiner Zaͤpffer das angestochene Faß nit koͤnte ohne Nachtheil / und Verletzung des Weins zum feilen Kauff außgezapfft werden / auff solchen Fall sie den Werth auch [ver]ringeren moͤgen / im Fall sich aber jemand dem zugegen verhielte / und straffbahr befunden wuͤrde / derselb soll Unseren Buͤrgermeisteren / und Rath / der Statt zu Gutem / von / jedem Bodden <47> Fuͤnff Rader-Marck¹⁵ zu geben / und nichts destoweniger das Faß / als wan Ers außgezapfft / zu verzießen schuldig seyn.

Item / wan es sich auch durch Mißwachsung / Thewrung / oder Steigerung der Wein / und sonsten {welches GOtt verhuͤte} / wuͤrde zuetragen / daß kein gemeiner Zapff vorhanden / und also kein Wein zum feilen Verkauff gezapfft wuͤrde / sollen Unsere Buͤrgermeistere Zur Zeit zu Erhaltung Gemeinen Guten Weines / Nutz / und Policey-Ordnung auff anhalten deren Zinßmeisteren den Buͤrgeren / welche Wein bey sich ligen haben / zu zapffen befehlen / welche alsdan auch bey ihren Buͤrger Ayden Ihnen den Gehorsamb leisten / und in weigerungsfall durch Unsere Buͤrgermeistere / und Rath / vermoͤg habender Privilegien / und Statuten darumb ernstlich bestrafft werden sollen / doch solle diese Unsere Ordnung bey denen angefangen werden / welche mit Weinen am besten versehen / und folgents also nach advenant, nemblich den 10ten Theil seines ligenden Weins zu zapffen / ohn angesehen der Persohnen fortgeschritten werden.

Wan auch Zweifel vorfiele / oder einer weniger Wein hinter ihm zu haben sich vernehmen ließe / als doch were / alsdan sollen die Zinßmeister macht haben / in den Keller zu gehen / und die Gelegenheit zu sehen / und da sich hierinfalß jemandt wuͤrde ungehorsamb bezeigen / und Unseren Buͤrgermeisteren / und Rath widersetzen / derselb soll Ihnen zur Buß / md Buͤrgerlicher Straff geben von jederem Bodden 2 Goldtgl. alles bey Poen der Pfaͤndung.

Item es sollen keine Faͤßger mit Offenem Wisch / noch sonder Wisch ohne vorwissen deren Zinßmeisteren außverkaufft / sonderen deshalben in alle weege zur handthabung gemeinen Nutzens verwendet werden / jedoch was mit Accins-Massen außgemessen / oder verkaufft wird / darvon soll gebuͤhrliche gantze Accins gegeben werden.

Item welcher Buͤrger seinen offenen Wisch wider eingezogen und abgeworffen / soll folgents nach vollendetem Zapff hinwider vierzehen Tag sich Zapffens enthalten / und still sitzen / ehe / und zuvor Er mit Offenem Wisch / und zum feilen Kauff soll zu zapffen Macht haben. [M2] <48>

Item die Zinßmeistere sollen auch keinem Buͤrgeren / so kurtz / oder lang mit Offenem Wisch gezapfft / und seine Accins darvon unbezahlt schuͤldig blieben / folgents weiter zu zapffen er­lauben / ehe / und bevoren die alte / und vorige schuͤldige Accinß entrichtet;

Item ferner ordtnen / und wollen Wir / daß hinfuͤhro ein jedes Fuder¹⁶ Weins / so in die Statt / und darzu gehoͤrige gantze Buͤrgerschafft durch die Buͤrger / oder Einwoͤhnere derselbigen bracht / und gefuͤhrt wird / an ablegens Geldt zu geben schuldig seyn soll / Acht Marck Coͤllnisch / und solches alles nach advenant, der Faͤßer zu rechnen.

Es sollen aber hierin die Churfuͤrstl: Raͤth / und Beambte nicht begriffen / sondern soviel ihr Gewaͤchs belangt / obberuͤrter Accins gaͤntzlich entledigt / und befreyet bleiben / wie auch darneben allen anderen Buͤrgeren und Einwoͤhneren / so kein Weinhanthierung / noch Wirthschafft treiben / ihren Tranckwein / was sie dessen zu eines jeden Haußhaltung bedoͤrffen / frey gelassen werden.

Item es soll auch jedes Fuder Wein / so hin und wider verkaufft / und auß der Statt / oder Buͤrgerschafft gefuͤhrt wird / an der Pforten der Statt zur Accins geben / und zu zahlen schuldig seyn / 8 Marck / neben einem Alb[us] weggeld von jeder Ahmen¹⁷ / welche 8 Marck durch den Verkaͤuffer / das weggeldt aber durch den Kaͤuffer solle gegeben / und bezahlt werden / jedoch Unseren Raͤthen / und Beambten / so viel ihr Eigen Gewaͤchs anlanget / obangedeuter Freyheit / wie oben bey dem einfuͤhren vermeldet / vorbehalten / dahe auch ein Buͤrger zu seiner Haußhaltung einigen Wein auff sein Hauß / oder Wohnung ausser der Statt / schicken wuͤrde / soll solcher Wein / vermittels gnugsamer Anzeig / und Betheurung / daß dene also in Warheit seye / an der Pforten nichts geben / son­deren frey seyn.

Es sollen aber Probst / Dechandt / Capitul / und andere Personen der Kirchen S. Cassii, wegen habender Immunitet, und Privilegien in dieser obangeregter / und allen anderen Accisen / so viel ihr Eigen Gewaͤchß / und Haußhaltung betrifft / so wohl in- als außwendig an der Pforten / und sonst befreyet seyn. <49>

Im Fall aber einiger Geistlicher uͤber diese obgemelte Freyheit sich einiger Commercien / und Hanthierung undernehmen wuͤrde / derselb soll nicht allen die angedeute Accins zu bezahlen schuldig seyn / sonderen auch von Uns zu gebuͤhrender Straff angehalten werden.

Item ein Buͤrger außerhalb der Statt in der Buͤrgerschafft / als benentlich zu Dronßdorff¹⁸ / und Rheindorff oben der Bruͤggen einkaufft / und in die Statt einfuͤhrt / derselbig Wein soll der Statt geben / und der Verkaͤuffer zu bezahlen schuldig seyn / jedes Fuder Acht Marck /

Item da einige Außwendige / so alhier im Boͤnner Bahn Guͤter / und Weingarten haben / ihre Wein außer der Statt hinweg fuͤhren wuͤrden / sollen an den Pforten von jederem Fuder zu geben schuldig seyn / Sechs Marck / jedoch den Geistlichen ihre Immunitet, und Freyheit / wie oben gemelt / vorbehalten.

Ferner ordnen / und wollen Wir / daß Zwey Fromme Maͤnner zu Rheindorff / und auch zwey zu Transdorff erwehlet werden sollen; welche Vier Maͤnner / sambt anderen Schraͤderen¹⁹ sonderlich darauff veraͤydt werden sollen / die Ord­nung zu halten / und sollen bemelte Vier Maͤnner solche Zinnß empfangen / und einbringen / und die Schraͤdere alle Wochen anzeigen / was / weme / und wie viel sie geschraden;

Ebener gestalt sollen auch die Statt-Schraͤdere / sambt dem Kranen-Meister fleißig eines jeden Kaͤuffers / und Verkaͤuffers Nahmen / und Zunahmen / und wie viel sie auß- und eingeschraden / und gekrahnet / auffzeichnen / und darvon gewiße Zettelen alle Tag den Zinß-Meisteren liefferen / welche auch nach Verlauff eines jeden Monats ihre Rechnung vor den Buͤrgermeisteren und zweyen Persohnen von der Gemeinden mit solchen Zettelen verificiren / und alle jetzt benante Persohnen darzu sonder­lich veraͤydet werden sollen.

Es solle auch den Schraͤderen uͤber ihre verordnete Belohnung ein mehreres zu forderen nicht erlaubt seyn / sonderen ernstlich darauff gehalten werden / damit Niemandt durch Geschenck verleitet / und druͤber beschwert werde.[N] <50>

Item soll mann jede Ahm Weins / so zum feilen Kauff mit der Massen / oder Offenem Wisch verzapfft wird / zu Accins mit einem Viertel Weins {thuet ein Fuder sechs Viertel} ohne Nachlaß zahlen / und soll dasselbige nach advenant verzapfften Weins verstanden / gerechnet / und bezahlt werden.

Item da auch ein Buͤrger dem anderen binnen der Statt Wein abgelten wuͤrde / soll der Verkaͤuffer ingleichen der Statt vom Fueder geben Sechs Marck.

Item dahe Ein Außwendiger alhier nacher Bonn Wein bringen / in die Statt aufffuͤhren / und einkelleren wuͤrde / soll von jedem Fueder an ablegens Geldt gleichs den Buͤr­geren / geben 8 Marck.

Item wuͤrde ein derselbig Außwendiger folgents uͤber kurtz / oder lang / solchen Wein zum theil / oder zumahl einem Buͤrger / oder Frembden verkauffen / so soll Er Verkauffer der Statt von jedem Fueder geben 8 Marck.

Wuͤrde aber beruͤrter Außwendiger allsolche seine hieselbst auffgefuͤhrte und gekellterte Wein hinwiderumb gantz / und ohnverkaufft zur Statt außfuͤhren / soll Ihme solches ohn weiter ungeldt / jedoch gebuͤrlich weggeldt vorbehalten / frey gelassen werden / doch dergestalt / daß Ihme die Wein nicht passirt werden / Er habe dan zuvor bey Unseren Buͤrgermeisteren / und Rath / da sie zusammen seyn wuͤrden / sonst allen fuͤr Beyden zur Zeit Buͤrgermeister und Zinß-Meisteren / bey seinem Aydt behalten / und wahrgesagt / daß der Wein dieser Zeit sein aͤigen / andern nicht verkaufft / versprochen / noch dolosus Contractus einigermassen vor­gangen seye / und solle Ihme darfuͤr der Welt gefolgt werden.

Erfuͤnde man aber uͤber kurtz / oder lang hernach beweißlich / daß Er hierinnen betruͤglich gehandlet / sollen die Wein / Zwey Theil Uns / und Unseren Nachkommen / und das Dritte Theil Unser Statt Bonn ohnnachlaͤssigg verfallen seyn.

Und soll es gleicher gestalt auch in diesem Punct mit Einwendigen Buͤrgeren hieselbst / so von Bonn ab Wein zu Schiff / und anders / wohin dieselbe außer der Statt vereusseren / oder wegfuͤhren wolten / gehalten werden. <51>

Item sollen die Buͤrger so Accins, oder Ablegens Geldt der Statt schuldig / jederzeit nach Verlauff des Monats / darinnen die Wein gezapfft / eingelegt / oder außgefuͤhrt / Ihr Geld denen Zinß-Meisteren erlegen / und sollen die Zinß-Meistere darvon gebuͤhrliche Rechnung / und Lieferung des Geldes thun / wie darvon diese Ordnung / als hieroben gemelt / ferner disponirt, und außgefuͤhrt.

Wir lassen auch Uns gnaͤdigst gefallen / dieweil Uns die Waage / und Gewicht zu erkent / daß Zwey veraͤydete Wag-Meister / so der Waag im Buͤrger-Hauß taͤglich warten / und auff Unsere hierunden gesetzte Waag auffsehens hal­ben sollen verordnet / und belohnet werden.

Es sollen auch die Zinß-Meisteren ein Buch haben / und darin verzeichnen allen Wein / der in- und außerhalb der Statt und Buͤrgerschafft in- und außgeschraden wird / und wan einig Faß zur Statt in- und außgefuͤhrt soll werden / so sollen die Pfortenschreibere das nit durchfahren lassen / es werde ihnen dan ein Zeichen gegeben / welche Zeichen erwehnter Zinß-Meistere mit einem sicheren Stempel machen / und dabey schrei­ben solle / Tag und Datum / wie viel Weins / und wer denselben ein- und außfahren lassen / zu dem sollen die Schroͤder-Meistere alle Morgen zu 8 Uhren in die Accinß Stube kommen / und in besagter Accinß-Meisters Wein-Buch verzeichnen lassen / was / wie viel / wohe / und weme sie des negstvorigen Tags auß- und eingeschroden und demnach sollen die Zinß-Meistere / so das Buch gehalten / und alle Pfortenschreibere auch die verordnete zu Rheindorff und Dronßdorff jedes Sontags Nachmittag um 1 Uhren an das Buch zusammen kommen / die Zeichen / sambt dem Angeben der Schroͤder sehen / und uͤberschlagen / ob die zusammen stimmen.

Alsdan die Wirth / und Gasthaltere in der Statt / und Buͤrgerschafft anlangt / dieweil man auß hernegst vorangedeuteter Ordnung wohl erfinden / und außrechnen kan / wie viel Weins ein jeder Wirth Jaͤhrlichs in seinen Keller gelegt / und nach dem Herbst durch veraͤydete Wein Accinß-Meisteren / besichtigt / nach Nothdurfft besucht / und getreulich auffgezeichnet worden / wie viel dan noch hinter ihnen erfunden wird / und was Er verthan / darvon soll Er nach billiger Erkaͤntnus Unser Buͤr­germeister / Rath / und Zwoͤlffter / und sonst nach gehabter Nah­rung das Wirths-Geld erlegen. <52>

Es soll auch alsolcher Wein / so die Buͤrger ihren LehnsLeuthen mit Faͤßlein / oder Krugen verlassen / der gebuͤhr ver­zinset werden / und soll ferner kein heimblicher Winckel-Zapff / oder einige ohngebuͤhrliche Gesellschafft in den Haͤuseren auffgehalten werden / alles bey Poen 2 Gold-Guͤlden

Item soll keinem Buͤrger hernegst zugelassen werden / under einem Wisch zweyerley Wein zu zapffen bey gleicher Poen 2 Goldfl.²⁰

Zudem soll auch kein Buͤrger in Zweyen Haͤuseren / sonderen allein in dem Hauß / wohe selbst Er sein Taͤgliche Wohnung hat / zum feilen Kauff Wein zu zapffen zugelassen werden / und dahe jemandt sich hergegen verhalten / und bruͤchig gefunden wuͤr­de / soll der Statt zur Buß / und straff erfuͤllen seyn von jedem Bodem 1 Goldfl. / und gleichwohl Ihme der Zapff nicht gestat­tet werden.

Item soll kein Buͤrger / oder Einwohner / so Accinß zu geben schuͤldig / seinen Wein selbst ein- oder außschraden / sonderen soll solches durch die Veraͤydte Schraͤdere auß erheblichen Ursachen oͤffentlich geschehen laßen / und im fall sich jemandt von den Buͤrgeren hierin freventlich bezeigen / und die Ordnung ungehorsamlich uͤberschreiten wuͤrde / soll einem Ehrsamen Rath zu behueff der Statt / von jedem Boddem zur straff geben einen Goldtguͤlden.

Item es sollen auch hernechst keine Rothe Mosel-Wein alhier zu Bonn auffgefuͤhrt / viel weniger durch Offenen Wisch zum feylen Kauff verzapfft werden / wie imgleichen keine Coͤllnische Rothe Wein / so daselbst gekellert gewesen / sie sey­en gleich daselbst gewachsen / oder nicht / hieher nach Bonn zum feylen Kauff / oder Zapff nit zu bringen / noch auffzufuͤhren / als lang Hielaͤndische Rothe Wein vorhanden / und zu bekommen.

Dahe jemand aber andere Gute Rheinische Rothe Wein / so keine Moͤsseler / oben herab bracht / und dieselbe auß aller­hand Verhinderung alhier zu Bonn nicht außgekrahnet / sonderen laͤngs die Statt Bonn auff Coͤllen gefuͤhrt / und aldahe auß einem Schiff ins andere uͤbersetzt / und also herauff bracht worden / dieselbe sollen auffzufuͤhren / und zu verzapffen / zugelassen seyn. <53>

Item es ist auch bey dieser auffgerichter Wein-Ordnung fur gut / und rathsamb bedacht / und befunden / daß Keiner / so mit Offenem Wisch Wein zum feilen Kauff zapfft / gehalten seyn soll / Jemanden auff den Borg mit der Massen Wein zu zapfen / oder zu schencken / ohne vergehende bahre bezahlung / der dargebung eines Pfandts / dasselbige in dreyen Tagen zu loͤsen / wollte Er aber das nit thuen / und sich muthwillig / und weigerlich in der Zahlung / oder Gebung eines Pfandes halten wuͤrde / solches soll Unseren Buͤrgermeisteren / und Rath angezeigt / und die muhtwillige etliche Tag in Wasser / und Brodt / in der Buͤrgerlichen Custodien / oder sonst nach ihrer Uͤberfahrung gestrafft werden.

Und soll dieser obgemelter gestalt jedem Buͤrger / und Buͤrge­rin / ins gemein / Niemandt außgeschlossen / zu befuͤrderung der Handtierung frey stehen / und zugelassen werden / lauth dieser Ordnung / Wein zu zapffen / und Wein-Handtierung zu treiben / jedoch in alle weege Unserer Statt Bonn Ihrer Accinsen / und Gerechtigkeit / lauth jetztgemelter Ordnung / vorbehalten. <53>

21. Bier Accins belangent

Item soll jede Ahm Biers / welche zum feilen Kauff verzapfft wird / und in hiesiger Statt gebrawen / hinfuͤro zur Accins geben 8 Albus / Von den jenigen unverbottenen Bier aber / so von Coͤllen / oder sonsten von aussen herein gebracht / und verzapfte wird / jede Ahm 12 Albus zur Accins geben.

Darzu soll jede Ahm Biers / so auß der Statt gefuͤhrt wird / an der Pforten geben 4 Albus.

Es solle aber dabey neben von / jedem Gebrew Biers / so in alhiesiger Statt von Breweren zu ihrem aͤigenen / oder anderer Unfreyer Buͤrger behueff geschicht / das gewoͤhnliche Zeug-Geldt den Accins-Meisteren richtig abgestattet / und das Gemeine Statt Brew-Hauß / plus Offerenti verpfachtet werden.

Item sollen die Zinß-Meistere von den Breweren / so offt Sie gebrawet / gefordert werden / das Bier zu betrinken / und darvon Unseren Buͤrgermeisteren / uud Rath Relation zu thuen / auch im fall der Nothdurfft den Buͤrgermeisteren zur Zeit / das <54> Bier betrincken / und kohren lassen / demnegst solches nach billigem Werth auffgethan / und verzapfft werden solle /

Auch hinfuͤhro keinem Brewer zugelaßen werden / sein Bier zu verzapffen / es seye dan zuvor jetzt beruͤrter maßen betruncken / und auffgethan worden.

22. Ordnung der Krämer

Accins.

Der Reichsthaler per 80 Albus

Und weilen dan auch von undencklichen Zeiten es in hiesiger Statt also hergebracht / daß die jenige Waaren / so von Außwendigen hineingebracht / und verkaufft werden / von denselben dieser Ordnung gemeeß veraccinst worden; und dieweniger nit die Einwendige / welche alsolche Waahren nit zu Ihrer Consumption, sonderen zum Gewerb / und Kraͤmerey eingekaufft / und solche damit wuͤrcklich treiben / die Kraͤmer Accinß davon unweigerlich abgestattet: Und solches nit allein von außwendig eingebracht verkaufft und veraccinsten Waahren / so in einer anderer gestalt von Einwendigen Kraͤmern wieder außverkaufft werden {alß wan / zum Exempel / das Fleisch / Unschlitt / und Hauth eines beym Eingang Veraccinsten Viehes von Fleischhaweren / Kertzenmacheren / und Loͤhreren wieder außverkaufft wird} sonderen auch / wan dergleichen von Außwendigen eingebracht, und veraccinste Waahren {alß Eisen / Mehl / Butter / und dergleichen} in seiner unveraͤnderter gestalt von Einwendigen Kraͤmeren wieder außverkaufft wird: So lassen Wir es auch also fort dabey so lang bewenden / biß darahn Hiesige Statt von den Verlauff / und schweren Schuldenlast / warinnen sie dermahlen gerathen / sich außgewuͤrckt / und Wir / oder Unsere Nachfahren demnegst in diesem / und dergleichen stuͤcken ein anderes verordnet haben werden.

23. Wüllen Gewand Accinsz.

24. Fellwerck Accinsz.

25. Hutmacher / Hosenstricker / Seyler / Korbmacher / Kannengießer / auch allerhand Erden- und Glaser-Accinß

Diese sollen sich mit den Accinß-Meisteren vergleichen / und von Guͤlden werth geben 6 Heller.

26. Gesalzen Fisch Accinsz.

27. Grüne Fisch Acccinsz.

Der Gruͤne Fisch Accinß soll / wie alle andere Accinsen bedient / und verrechnet / der Fisch-Marck aber hinfuͤhro bey der Fontainen gegen der Accinß-Stuben gehalten werden.

28. Becker Accinsz.

29. Viehe Accinsz.

30. Fleischhäwer / und Schlacht Accinß.

Und sollen die Fleischhaͤwer schuͤldig / und gehalten seyn / alles Viehe / groß und klein / ehe / und bevor sie schlachten / es den verordneten Accins-Meisteren / bey straff der Confiscation, anzugeben / und demnegst in dem Gemeinen verordnetem Schlacht-Hauß abzuthuen / und anders nit / alß in den Hallen nach dem gesetzten Preiß zu verkauffen / und der Ordnung gemeeß zu veraccinsen.

31. Schuchmacher Accinsz.

Die Schuchmacher Accinß belangendt / solle vom Guͤlden werth Sechs Heller auffgehoben werden.

32. Wein Rode / und Underkauff des Weins

Ein Fuder Weins in der Buͤrgerschafft zu roden 1 Rader-Albus.

Item ausser der Buͤrgerschafft in der Bahnmeillen zu roden Zwey Rader-Albus.

Item ein Fuder Weins zu underkauff Zwey Rader-Albus.

33. Accinsz des Salpeters.

Item nachdem in Unser Statt Bonn vorzeiten viell Salpeters gesotten / auff Coͤllen / und anderswohin gcfuͤhrt / und auswendig verkaufft worden / so soll dasselb {falß ins kuͤnfftig dessen alher wieder gesotten werden solte} in die Waag gebracht / daselbst gewagt / und vom Centner zur Accinß gegeben werden 3 Albus.

34. Von Verpfachtung / und 21 Bedienung aller Accinsen / etc.

Und damit nun alle / und jede vorgedachter Unserer Statt Accinsen / und Gefaͤlle zu mehrerem Auffnehmen / und Gedeyen Derselben Unserer Statt / richtig / und fleißig bey- und einbracht werden moͤgen / So ordnen und wollen Wir / daß darzu Zwey Ehrbahre / Fromme / Getrewe / und solchen Wercks Verstaͤndige Buͤrger deputiret, beaͤydet / und angenohmen werden / mit ernstlichem Befelch / solche Accins / oder Accisen bey geleistetem Aydt / und ihre Belohnung {so ihnen nach gestalten Sachen / ihrer Muͤhe [P2] <60> und Arbeith durch Rath / und Zwoͤlffter / wie hierunden ferner vermeldt / verordnet / und gemacht werden solle} getrew / und fleißig ein- und auffzuheben / auch darvon / nach lauth dieser Unser Reformation und Ordnung / gewisse / und gebuͤhrliche Rechnung / Liefferung / und Bezahlung zu thun.

Ferner setzen / und ordtnen Wir / daß diese vorangeregte Ordnung / also continuirt, und wuͤrcklich gehalten werden soll / mit diesem Anhang / und Zusatz / wofern in kuͤnfftigen Zeiten Unseren Buͤrgermeister / Rath / und Zwoͤlffteren rathsamb / und noͤthig zu seyn bed[e]uchte / bemelte Ordnung in ein- oder anderem Punct zu besseren / zu enderen / darab- und zuzuthun / daß ihnen auff vorgehende eintraͤchtige Vergleichung hiemit zugelassen seyn solle / solches Uns underthenigst vorzubringen / demnegst Wir dan gestalten dingen nach ferner / was billig ist / verordnen wollen.

35. Von den Rahmen / so auff der Gemeinden Guht wachsen.

Dieweil auch under anderen befunden / daß Jaehrlichs auff Unser Statt Gemeinden / und der Statt Graben ein gute Anzahl von Weiden-Rahmen wachsen / und gehawen werden; So wollen Wir / daß hinfuͤro die angedeute Rahmen / so auff der Gemeinden Guhtt Jahrlichs wachsen / und gehawen werden / Plus offerenti, so wohl under der gemeinden / als dem Rath sollen verkaufft / und verlassen werden / und die Riffel-Gerten / so von den Rahmen abfallen / zu behueff des Hawlohns / oder sonsten verkaufft / und die Schantzen zu Hitzung der Stuben Ofen auffs Buͤrger-Hauß gelifert werden. <61>

36. Von dem Wüllen Zinsz / oder Standtgeldt auff S[ankt] Catharinae Tag / wan zu Bonn Jahrmarck ist.

Das Standt-Geldt {so von dem Wuͤllen Tuch auff St. Catharinae Tag in Unser Statt Bonn feyl ist} soll durch die Accinß-Meistere / auffgehoben / von denen / so ihre Tuͤcher auffm Rucken herein tragen / mehr nit / als 20 Alb. von anderen aber / so in großer Quantitaͤt selbige auff den Marck bringen / uͤber 2 Reichsthaler nit gefordert werden / die aber mit Seiden / und Wuͤllen Stoffen / feinen Leinewand / und Spitzen auff den Jahr-Marckten feilhaben / und nit Buͤrger seynd / sollen fuͤr Standt-Geldt und Accins zahlen jedesmahl 20 Alb. von jedem Standt auff dem Wochen-Marck aber 16 Alb.

Und da Jemand gefunden wuͤrde / so außer den Wochen-Maͤrckten heimlich / oder oͤffentlich verkauffen thete / der soll Vier Goldtgulden verwirckt haben / halb der Statt / und halb den Accinß-Meisteren / jedoch soll hierin mit deren geringeren Kraͤmeren / so nit mehr als Nadelen / Riemen / Loͤffelen / Schuͤsselen / Spiellen / und dergleichen geringschaͤtzige Waar verkauffen / ein Underscheidt gehalten / und von demselbigen nit mehr als 1 Alb. 6 Hlr. und nach Gelegenheit auch geringer eingenohmen werden / vorbehaltlich Uns / und Unseren Nachkommen hierin Unser Gerechtigkeit wegen Außtheilung deren Ellen / durch Unseren Land-Botten zur Zeit zu beschehen.

37. Vom Standt-Geldt / und Accinsen der Newen Jahrmärck.

Nachdeme Unser Buͤrgermeistere / Scheffen / Rath / und Zwoͤlfftere / auch Gemeine Buͤrgerschafft von Unseren Vorfahren Zwey Newe Jahr-Maͤrck / Einen auff Cathedra²², und den Anderen auff Vincula Petri²³ <62> zu halten bewilligt / und zugelassen / lauth daruͤber auffgerichte Privilegien / und Briefflichen Scheins / So haben Wir ihnen dieselbe auß sonderbahren Gnaden wissentlich confirmirt, und bestettigt / und dieselbe ihnen nachmahls gnaͤdigst verordnet / und zugelaßen / Wollen demnach daß das Standt-Geldt auffm Buͤrger-Hauß / wie imgleichen von den Kraͤmeren auffm Marck / und sonsten in all / und gleicher Gestalt wie oben / auff dem Jahr-Marck auff S. Catharinae Tag / verordnet / solle eingefordert / und bezahlt werden.

Es soll auch von Unser / und Unserer Nachkommen wegen Unser Land-Bott auff diesen Newen Jahr-Maͤrcken die Ellen under die Kraͤmer außtheilen / und die Gerechtigkeit einnehmen / wie oben auff dem Jahr-Marck S. Catharinae herbracht / und braͤuchlich.

38. Von der Statt Waagen / und Ihrer Ordnung.

Nachdeme an richtiger Einbringung aller / und jeder der Statt Accinsen groß / und klein / dem gemeinen Nutz nit / wenig gelegen / so ist fuͤr rathsam bedacht / wie Wir auch hiemit gnaͤdigst ordnen / und wollen / daß zu dem Ende alle / und jede Waaren / und Zinßbare Guͤtter / ins gemein / darvon hier oben Meldung geschehen {doch der vorauffgerichter Wein Ordnung damit nichts benohmen} in der Statt verordnete Waage gebracht / und daselbst den veraͤydten Waag-Meisteren zur Zeit / sambt den Accinß-Meisteren zu eroͤffnen / und zu besichtigen frey / und zugelassen seyn solle.

Und sollen die Waag-Meistere die Waaren alsolang in der Waagen behalten / biß daß die gebuͤhrende Accinß darvon denen Accinß-Meisteren erlegt / und bezahlt seye.

Damit auch diß Werck desto auffrichtiger / und ohne Betrug zugehen moͤchte / soll hinfuͤro nicht gestattet / noch zugelassen werden / daß jemand in gepackten Faͤßeren / zugemachten Koͤrben / Saͤcken / <63> oder soͤnsten / am Rhein / oder Pforten / in die Haͤußer einschleiffe / trage oder tragen lasse / sonderen soll solche durch der Statt veraͤydte Traͤger Knecht beschehen / diese aber alle Guͤter zuvor in die Statt Waage liferen / und denen Waag- und Accinß-Meisteren zu vorgemeldem Ende darstellen.

Und dahe daruͤber jemand etwas in sein Hauß heimblich / oder oͤffentlich / durch sich selbst / oder jemand anders einschleiffen / oder tragen lassen wuͤrde / soll Er dardurch die also hineingebragte Waar zu Behueff der Hauß-Armen verwirckt / und verlohren haben / auch darneben Unser Statt Bonn zum Baw Fuͤnff Goldtgl. zur Straff / und Buß ohnnachlaͤßig erlegen.

39. Von allerhand Englischen / und Wüllen Tücheren.

Was Englische / und sonst Wuͤllen Tuͤcher belangt / dieselbige sollen hinfuͤro zu richtiger / und gewisser Einbringung der schuldiger Accinsen / in massen / wie oben / von anderen Guͤtteren / und Wahren ins gemein angedeutet / ehe sie in die Haͤußer bracht / in die Waag gelifert / und darzu nit allein die Waag- und Accinß-Meistere / sonderen auch die veraͤydte Streichere {deren Zwey verordnet werden sollen} beruffen / und gefordert werden / gestalt dieselbe Tuͤcher zu streichen / zu bleyen / in Verzeichnus zu bringen / und darvon die schuldige Accinß / lauth dieser Unser Ordnung alsbald zu empfangen / und einzunehmen / alles bey Verlust deren Tuͤcher / zu Behueff der Hauß-Armen / und obangesetzter Straff von Fuͤnff Goldtgl. der Statt zum Baw unweigerlich zu erlegen.

Und wieviel hiebevor / wan ein Newer Gewandt-Schneider Ambts-Bruder ankommen / und Gewandt zu schneiden angefangen / ein nicht geringschaͤtzig Essen bey dem Rath / und Gewandt-Schneider Ambt gehalten worden / So wollen Wir daß hinfuͤro solch Essen hindangesetzt / und abgeschafft / der New Ankommender Gewandt-Schneider Ambts-Bruder aber an statt desselbgen Essens Unser Statt Bonn zu Gemeinen Besten / [Q2] <64> einmahlen fuͤr all geben / und erlegen soll 12 Goldtgl. demnegst einem jeden Buͤrger / und Buͤrgern {so solche 12 Goldtgl. erlegen koͤnte / oder wolte} frey / und zugelassen sein / diese Handtierung mit Wuͤllen Tuͤcher zu treiben / jedoch Unserer Statt in alle Weege ihre Accinsen vorbehalten.

40. Von Verordtnung eines Marck-Meisters / und seinem Ambt / mit angehengter Marck-Ordnung

Zu Befuͤrderung Gemeinen Nutzens / und daß auff dem Marck / und sonst allerley Unrichtigkeit mit ungebuͤrlichen Ein- und Auß verkauffen / vermitten / auch aller Betrug mit verkauffung der boͤser / fauler / unauffrechter Waar hindangesetzt / und keine andere / als gute auffrechte / und Marckgebige Wahr verkaufft / auch darunder gebuͤhrender Underscheidt / und Ordnung gehalten werde / Wollen / und ordnen Wir / daß ein Getrewer / und fleißiger Buͤrger beaͤydt- und belohnt werde / welcher fleißige Auffsicht haben solle / daß diese Unsere nachfolgende Ordnung allenthalben gehalten / und die uͤbertrettere / wie sichs gebuͤhrt / gestrafft werden.

Solle also bemelter Marck-Meister gute fleißige Auffsicht haben / daß das Fischwerck / so auffm Marck verkaufft wird / es seye frisch / oder gesaltzen / auffrecht / und gut seye / und solle Niemanden zugestanden / noch zugelassen werden / die Waar / so nit Kauffmans Guth / oder ohnauffrechte Waar were / zu verkauffen / oder in einige weege zu verhandlen / Dabeyneben solle bemelter Marck-Meister zur Zeit fleißige / und getrewe Auffsicht haben / daß die Kraͤmer ihre Butter / Kaͤß / Speck / Ollig / fort andere fette Wahr / dergleichen Haͤring / Boͤcking / Stockfisch / Laberdahn / Scholen / Saltz / und dergleichen nach Gelegenheit der Zeit / und Jahren, nach advenant, wie solches zu Coͤllen verkaufft / und gegolten wird / auff zimblich maͤßig Gewinn / mit rechter Maaß / und Waagen / ohn einige Falschheit / und Betrug / so wohl mit kleinem Gewicht / Stuͤck / und Maaßen / als mit großem / nach eines jeden Notturfft / Gelegenheit / und Gesinnen außverkauffen / und verlassen / zu welchem Ende sich der Marck-Meister / wie hoch / und <65> thewr vorberuͤrte Waaren zu Coͤllen gekaufft / und gegolten werden / so offt als es die Notturfft erfordert / und wenigstens alle Vier Quater temporen erkuͤndigen / und daruͤber Zeitlichen Buͤrgermeisteren referiren / welche doch auch hieruͤber absonderlich fleißige Sorg traͤgen sollen.

Wofern aber jemandt / Er seye ein In- oder Außwendiger / einige Haͤring / oder sonst gesaltzen Fischwerck / oder auch einige andere Waaren / wie sie Nahmen haben moͤgen / auff dem Marck in Unser Statt Bonn feyl haben wolte / so belauffen / garstig / und kein auffrichtig / taͤuglich Marckgebig Gutt were / solches solle der verordnete Marck-Meister nit allein keines weegs gestatten / noch zulassen / sonderen den Verkaͤufferen anzeigen / und befehlen / dasselbe Gutt von stundt an vom Marck ab- und auß der Statt zu schaffen / und wofern er selbig nicht guttwillig thun wuͤrde / alsdan soll der Wasen-Meister solch Gutt / auff Ansuchen des Marck-Meisters zum Rhein hinein fuͤhren / und dieweniger nit ein solcher Verkaͤuffer der Statt in die Poen von 5 Goldgl. verfallen seyn.

Were es auch Sach / daß ein Buͤrger oder Auswendiger auff dem Marck Pickelhaͤring / Schollen / Rheinfisch / Bollig / oder sonsten Spierling / und Ausschuß der Stockfisch / und Buͤcking {welches alles mit Langheit der Zeit / ehe es verkaufft / umbgangen / und doch nit allerdings verwuͤrfflich / oder untuͤchtig} feyl haben / und verkauffen wolle / so sollen sie solch Fischwerck nit auff den gemeinen Marck bey anderen auffrichtigen Marckgebigem Gutt feyl / sonder seinen absonderlichen Standt / und Platz darmit haben / auff dem understen Theil des Marcks hinter dem Puͤtz / und Fonteinen / und nit so thewer verkauffen / als ander auffrichtig Gutt / sonderen fuͤr einen geringeren Werth / oder im Fall des gegentheils auff Anzeig des Marck-Meisters an stund einpacken / und vom Marck hinweg fuͤhren / darin der Marckmeister allzeit ein fleißiges Auffsehen haben soll.

Nachdeme setzen / und ordnen Wir / daß hinfuͤro kein Buͤrger / oder Außwendiger auff Hochzeitliche und Sontaͤge / Unser Lieben Frawen / Apostel / und anderer Heyligen Feyrtaͤge ichtwas anderst / als gruͤne Fisch auff Fasten Feyrtaͤgen auff dem Marck verkauffen / oder feyl haben solle / und im Fall einer vorgemelter Heyligen Taͤgen auff Mittwoch / oder Sambstag / als die [R] <66> gemeine Wochen Marck-Taͤge einfielen / so soll der Marck jederzeit den Tag zuvor gehalten / und das Marck-Zeichen durch den Marck-Meister außgesetzt werden.

Es soll auch kein Buͤrger / oder Buͤrgersche auff bemelte Heylige Taͤge einige Kraͤmerey / oder Waaren fuͤr- und in den Fensteren / oder Thuͤren außhangen / oder setzen / allein soll dem Marck-Meisteren auff vorgemelte Heylige Taͤge zu behueff der gruͤner Fisch die Marck-Waag am Vormittag / und laͤnger nit außzusetzen / zugelaßen seyn.

Es sollen auch auff denen gemeinen Marcktaͤgen / und sonst in der Wochen keine unzeitige Kaͤlber / so nit drey / oder vier Wochen alt / zum feilen Kauff bracht / noch durch den Fleischhaͤwer gekaufft / abgethan / und in der Fleischhallen außverkaufft werden / und dahe dargegen jemandt befunden / und handlen wuͤrde / sollen solche unzeitige Kaͤlber / ohne Saumbnus / auff Anzeig des Marck-Meisters in den Rhein getragen werden.

Wir ordnen / und Wollen gleichfals ferner / daß auff den Gemeinen WochenMarcktaͤgen / und sonst hinfuͤro ahn Außwendige kein Verkauff mit einigerley Viehe / Fruͤchten / oder anderer Waar / so auff den Marck zum feilen Kauff gebracht wird / soll getrieben / und gebraucht werden / ehe / und zuvor die Marck Klocke geleutet ist / und soll dieselbe durch das Jahr geleutet werden / nemblich von S. Remigii Tag [= 1. Oktober] an / biß auff den ersten Tag Mey Monats zu Eilff Uhr / und vom Ersten Maji biß auff S. Remigii Tag zu Zehen Uhren Vormittags; Were auch Sach / daß einiger Außwendiger vor solchen Stunden etwas / es were Viehe / Fruͤchten / oder sonst was es wolle / auff dem Marck abgekaufft / und gegolten hette / und ein inwendiger Buͤrger / oder Buͤrgerin daruͤber zu maßen kaͤme / der gegoltener Waar begerte / und den Werth darfuͤr / wie der Außwendiger solche Waar gedingt / oder gegolten / zu erlegen willig were / auff den Fall soll der inwendiger Buͤrger / oder Buͤrgerin den Vorzug haben / und der Außwendiger darvon abstehen / wan aber folgents nach verlauff der Zehenten / oder Eilfften Stunden / respective die Marck-Klocke geleutet ist / so soll Jedem / sowohl Auß- als Inwendigen / seines gefallens frey stehen zu gelten. <67>

Neben diesen wollen / und ordnen Wir / daß kein Inwendiger Buͤrger / oder Buͤrgerin einige Fruͤchten / oder andere Waaren binnen der vorgemelten Stunden / und ehe die Marck-Klock geleutet ist / zu behueff eines anderen Außwendigen auff den Vorkauff heimblicher weise auffkauffen / und darnach zuschicken solle / bey straff ihnen oder ihme nach ermessung unserer Buͤrgermeisteren / und Rath auffzulegen.

Es sollen auch keine Viehe-Treibere / so binnen Unser Statt Bonn ihre Wohnung / und Handtierung mit dem Viehe haben / von anderen Außwendigen Viehe-Treiberen / oder Hauß-Leuthen / so Feist / oder Mager Viehe auff den Marck feil bringen / so lang der Marck daurt / einig Viehe / Fett / oder Mager / auff den Vorkauff / dasselbige widerumb zu verkauffen / entweder durch sich selbst / oder ihre Diener auffgelten / Und an sich schlagen / auch zu dem Ende denen Außwendigen den Abendt vor dem Marck-Tage vor die Pforten / und sonst nicht entgegen gehen / sonderen soll solches hinfuͤhro zu Nachtheil Unserer Buͤrgerschafft nit gestattet werden / und dafern Jemandt dagegen handelte / solle Er umb deßwegen hart gestrafft werden.

Nachdeme obgemelter Viehe-Treiber / so in Unser Statt Bonn haußhalten / in Unserem Ambt Bonn / Lintz / zu Sigburg / im Bergischen Landt / und sonst hin / und wider / unten / und oben / in- und ausserhalb Unseres Ertz-Stiffts viel Viehe / Feist / und Mager auffgelten / auff Coͤllen / und anderswohin auff- und ab verfuͤhren / und dardurch ein Gemeine Theurung solchen Viehes verursachen / so sollen die Viehe-Treiber / so in Unser Statt Bonn jetzo wohnen / oder kuͤnfftig mit der Wohnung dorthin sich begeben wuͤrden / mit dem Viehe / so sie vorgemelter gestalt auffkauffen / binnen Unser Statt Bonn / ehe Sie dasselb auff Coͤllen / und anderswohin verfahren / und wegtreiben / den Vormittag von Neun Uhren biß Zwoͤlff / Stapffel²⁴ halten / und Unseren Buͤrgeren durch einen billigen Preiß / und zimblichen Werth den Vorkauff laßen / und im uͤbrigen die Statt mit besserem Rind- und anderem Fleisch / als biß heran beschehen / sowohl diese / als andere Fleisch-Haͤndlere hinfuͤhro versehen / als viel ihnen immer moͤglich seyn wirdt.

Es soll auch vor der Pforten / in Gassen / Strassen / noch auff dem Werff am Rhein / durch in- und Außwendige / wie die auch <68> auch Nahmen haben moͤgen / kein Vorkauff einiger Waar / oder Guͤter / in Meinung dieselbe anderen zu verkauffen / geschehen / gebraucht / noch zugelassen werden / sonderen soll alles auff den freyen Marck passirt / und gebracht / auch daselbst obberurter massen vor- und nach geleuther Marck Glocken verkaufft / und gegolten werden / bey Straff von Buͤrgermeisteren / und Rath den Verbrecheren auffzulegen / keines Wegs aber solle sich fuͤrderhin jemand / Er seye auch wer Er wolle / geluͤsten lassen / die Verkaͤuffere mit Gewaldt durch sich / oder andere in sein Hauß zu zwingen / und dardurch den Marckkauff zu verhinderen / geschehe aber solches / so solle es underthenigst angezeigt werden / und daruͤber gezimmendes Einsehen geschehen.

Es soll jedoch einem Buͤrger / oder Buͤrgerin frey stehen / vor / einer Thuͤr / und Wohnung an den Pforten / in Gassen / und Strassen / diese / oder jene Waar zu ihrer nottuͤrfftiger Haußhaltung einzugelten.

Item dahe sich auch hernegst begeben / und zutragen moͤchte / daß jemandt einen Wagen / oder Kahren mit Fruͤchten / so auff dem Marck feyl gebracht / vor geleuther Marck Glocken gegolten hette / und daruͤber ein ander Mit-Buͤrger zumassen kaͤme / und fuͤr sein Haußhaltung von demjeinigen / so einen Wagen / oder Kahren gegolten / ein Sester / Stuͤmber / halb Malder / oder Malder / alles nach Gelegenheit / und Behueff seiner zur Zeit noͤthiger / und beweißlich habender Haußhaltung / und keiner anderer Gestalt fuͤr paar Geldt begehren wuͤrde / auff den Fall soll der jeniger / so die Fruͤchten gegolten / schuldig seyn {wie es ohne das fuͤr sich selbst Christlich / und Nachbarlich} demselben Buͤrger solches im gleichen Kauff / wie Er dasselbe gegolten / ohne Gewinn / und Arglist / auff sein Begehren / wie vorgemelt / zu verlassen / wohe aber der angedeuter Kauff der Fruͤchten nach geleuther Marck Glocken geschehen wuͤrde / soll der jeniger / so die Fruͤchten gegolten / darzu gegen seinen guten Wllen nicht verpflicht / noch verbunden seyn.

Und damit auch Unsere Raͤthe / Ambtman / Vogt / Buͤrgermeister / Scheffen / Rath / Zwoͤlffter / und gemeine Buͤrgerschafft in Unser Statt Bonn ihre nottuͤrfftige Underhaltung fuͤr ihr Geldt desto baaß haben / ud bekommen moͤgen / so haben Wir allen / und jeden obgemelter / und Unser Statt zu Gnaden / <69> und sonderlicher Zuneigung / die Vorsehung / Anordnung / und Befelch gethan / und ergehen lassen / daß alle Proviant / Fruͤchten / Holtz / und anderes / was der Haußmann Unserem Ambt Bonn / und was anhaͤngt / uͤbrig / und auß seiner Haußhaltung / und Nahrung zu verkauffen / und zu entrathen hat / nirgendt anders dan in Unsere Statt Bonn / under einer namhaffter Poͤn / weder durch sich selbst / noch sein Gesind feyl / und zum Marck tragen / noch bringen soll.

Und soll durch den Marck-Meister zur Zeit / auch die Pforten Schreibere sonderlicher Fleiß / und Auffsicht beschehen / daß diese vorgeschriebene Ordnungen / also ohne Fehl / ohnangeschen einiger Persohnen strack vollzogen / und gehalten werden / und dahe sie daruͤber jemand betretten wuͤrden / der dieser Ordnung zugegen gelebt / und gehandlet / solches sollen Sie alsbaldt denen Buͤrgermeisteren zur Zeit zu erkennen geben / und fernere Erklehrung / und Befelch daruͤber ewarten.

41. Von aller Officianten Salarien / und Belohnung.

Dieweil nun diesem allem nach auch nit unbillig / daß die jenige / so der Gemeinden nuͤtzlich / trew / und wohl denen / fuͤr ihre Muͤhe / Arbeit / und Versaumbnus billige Belohung haben / Wir auch berichtet worden / daß obwoll die Officianten in Anderen Unseren Haubt Staͤtten nit so gar hohe / sonderen geringe Salarien haben / so seyen doch an denen oͤrtheren {umb deßwegen / daß die Buͤrgere das jenige / so Sie dem Rath / und Gemeinden schuldig seint / ohne Widerrede gehorsamblich erlegen / und die Officianten paratam Executionem jederzeit haben} die Officia besser / und mit viel weniger Muͤhe zu bedienen / dan allher / So wollen Wir / daß diesem auch seine Maß / Ordnung und Richtigkeit gegeben werde / also / daß Unsere Buͤrgermeistere / Scheffen / und Rath / auch Zwoͤlfftere von der Gemeinden wegen / alsbaldt / und am fuͤrderlichsten nach eines Jeden Officii obligender Muͤhe / und [S] <70> Beschwernus / auch dieser Unser Statt jetzigen Standt / und Unvermoͤgenheit biß zu besserem Gluͤck / und Wohlstandt / jeden Officianten fuͤr alsolche des Ambts Muͤhe traͤgliche Salarien verordnen / und moderiren sollen / wohe sie aber / wegen einiger Difficultet / oder einfallenden Zweifels / sich heruͤber nit vergleichen koͤnten / wollen Wir Uns solchen Stoß / und Mangel auff Ihre Relation, und Bericht / so Sie Uns thuen sollen / auß Landts-Fuͤrstl: Ambts gebuͤhr zu decidiren / und zu erkleren vorbehalten haben.

42. Von denen / so an den Hochzeitlichen Ehren-Tägen / Brautläufften / Kind-Tauffen / Königs- und Gaffel-Essen halber überflüßige ohnnoͤthige Unkösten anwenden.

Dieweil auch durch Haltung der Hoch-Zeiten / Kindt-Taͤuff / und Schenckung / wie auch Koͤnigs-Essen in Unser Statt Bonn auff dem Buͤrger-Hauß / und sonsten viel uͤberfluͤßige / ohnnoͤtge Unkoͤsten sich zutragen / welche Unseren Buͤrgeren / und Unterthanen daselbst zu nit geringem Beschwer gereichen / auch je laͤnger / je beschwerlicher uͤberhandt nehmen; Damit dan diesen, zunehmendem Unrath / Schaden / und Uͤbermaͤßigkeit fuͤeglich gewehrt / So ordnen / und wollen Wir / daß hinfuͤhro zu den Hochzeiten Unserer Buͤrger / und gemeinen Mans in Unserer Statt Bonn mehr nit / dan Zwey und Sechzig Personen von Beyderseits Freunden / und Partheyen / als nemblich von jeder Parthey Ein und Dreyßig Persohnen zum hoͤchsten / aber sonst wohl weniger / Und daruͤber nit geladen / noch beruffen werden moͤgen.

Desgleichen sollen auch zu den Gastereyen {so zu Zeiten nach dem Kind-Tauff etwa hiebevor weitlaͤuffig angestelt} hinfuͤhro mehr nit / dan zum hoͤchsten Vier und Zwantzig Personen / und daruͤber / oder mehr nit / den gebettenen Gevatteren mit eingerechnet / nur zu einer Mahlzeit geladen werden / dabey auch maͤssig / und nit uͤberfluͤßig / noch uͤber Zwey / oder zum hoͤchsten Drey Stunden nit gehalten / sonst alle andere deren <71> Kindt-Vetterinnen / und Ihrem Eheman beschwerliche Nach-Essen / wollen Wir hiemit gantz / und zumahlen cassirt, abgeschafft / und verbotten haben.

Desgleichen dieweil auch die Koͤnigs-Essen / so auff den Sontaͤgen auff dem Buͤrger-Hauß durchs Jahr in Unserer Statt Bonn gehalten werden {in deme / daß ein Buͤrger den Anderen mit Vielheit der Essen / und Schenckung der Zech / und Gelachs zu uͤbersteigen sich befleißiget / und einer vor dem anderen die Uͤbermaß abzustelen sich schaͤmet} zu Unserer Buͤrger heimblichem Schad / und Verderb / zu hoch / und weit sich verlauffen / So ordnen / und wollen Wir / daß hinfuͤhro zu den Koͤnigs-Essen auffm Buͤrger-Hauß nit mehr / als einerley Speiß / und maͤssiger Tranck / mit nohtduͤrfftigem Weitzen- und Roggen-Brod / durch den jenigen / an weme die Ordnung / mit dem Koͤnigs-Essen / soll auffgesetzt / und angerichtet werden / was dan von Wein von Vier Uhren / biß zu Sechs Uhren Nachmittags getruncken wird / solches soll in einer Summa gerechnet / und under die Personen / so gegenwertig seynd / mit [ge]gessen / und getruncken / gleich ohne Nachschenckung der beschwerlicher langwiriger Gratias-Trunck vertheilt / und einem jederen sein Antheil zu bezahlen / ehe das voneinander gehet / oder scheidet / angezeigt / und von dem Hauß-Knecht / wie braͤuchlich / eingebracht / empfangen / und bezahlt werden / und dahe daruͤber Unsere Buͤrgermeister / Raths-Verwandten / oder andere in die Gesellschafft auffs Hauß gehoͤrig / den Zech / oder Gelach / wie biß daher geschehen / schencken / und also Einer das Gelach sich selbst zur Beschwernus auff sich laden / und dieser Unser Ordnung zugegen handlen wuͤrde / derselb soll neben den Gelach zum Baw Unser Statt Bonn zur Buß verfallen / und zu erlegen schuͤldig seyn 2 Goldgl.

Und dahe unser Ambtman / Vogt / und Botten also fuͤr sich selbst / oder durch andere in glaubwuͤrdige Erfahrung kommen / daß einiger von unseren Buͤrgeren / und Underthanen {so nit vom Adel / kein Doctor, oder unser Rath were} dargegen vorsetzlich gethan / und solch unser Gebott ungehorsamblich uͤberschritten / verachtet / und nit gehalten hette / so soll der / oder die jenige / sowohl der Wirth / als die geladene Gaͤste vor unserem Ambtman / und Vogt vorbescheiden / solch sein / und ihre Uͤberfahrung ihnen vorgehalten / und wie sichs gebuͤhrt / nach befindung / derowegen gebruͤchtet²⁵ und gestrafft werden. <72>

43. Von Justification des Brods Waage / Maßen / und Gewicht.

Dieweilen es zu nit geringer Befuͤrderung Gemeinen Nutzens gereichet / daß in Unser Statt Bonn gut / und aufrichtig Brod / und Weck mit gebuͤhrlichem Gewicht dem Werth nach gebacken / auch aufrichtige Maaß / und Gewicht bey allen / und jeden Buͤrgeren / und Buͤrgerinnen / die welche deren zu ihrer Handtierung noͤthig / gebraucht werden / und desfalß ein Jeder fuͤr sein Geldt die Gebuͤhr bekommen moͤge /

Demnach wollen Wir / daß hinfuͤhro in Unser Statt Bonn alle Weitzen- und Roggen-Brodt {ausserhalb der Goͤbbelger²⁶ / so durch das Jahr / auch Britzelen / und Plaͤtz / so in der Fasten gebacken werden} nach der Groͤße / und seinem werth sein gebuͤhrlich Gewicht haben / und Unser Meyer / Vogt / und Scheffen mit Zuziehung Unseres Ober-Kellners / so oft / als es ihnen gut / und noͤtig zu seyn beduͤncket / und zum wenigsten / Viermahl im Jahr / wan man sich dessen am wenigsten versehet / von allen Beckeren ihr Weitzen- und Roggen-Brodt / soviel / als sie wollen / und die Nohtdurfft erfordert / in die Scheffen-Stube durch die Landt- und Gerichts-Botten hohlen lassen / und moͤgen dasselbe wagen / und justificiren, und die Weck nach advenant des Kaufs von dem Weitzen {derohalben man sich bey Unseren Buͤrgermeisteren / und Rath in unser Statt Bonn / und ihren Dieneren zu erkuͤndigen hette} auff die Waag legen / welches Brod und Weck dan nit aufrichtig befunden wuͤrde / dasselbige soll den Armen gegeben / und darzu von den Beckeren / und Bruͤchtigen die Bruͤchten einforderen / und Unß / wie von Alters / berechnen; auch jedesmahl dero Verrichtung / und befinden an Uns schriftlich berichten / auch an erwenter / zum wenigsten / Viermahliger Visitation sich nit saumseelig bezeigen / widrigen falß gewertig seyn / daß alsolche Visitation / und Waͤgung des Brodts / durch obgemelte Unsere / zur Statt-Policey verordnete / Drey Commissarien vorgenohmen / und bey befindender Untergewichtigkeit / sie so wohl / als die schuͤldige Beckere dafuͤr <75> und allen dadurch der Buͤrgerschafft zugefuͤgten schaden angesehen werden sollen.

Gleicher gestalt sollen auch alle Maßen / und Gewicht zum wenigsten Viermahl im Jahr besichtiget / und justificirt / wofern bey Jemandt ohnauffrichtige Maaß / oder Gewicht befunden wuͤrde / der / oder dieselbe mit Ernst / und / wie sichs gebuͤhrt / nach gelegenhet darfuͤr gebruͤchtet / und gestrafft / auch oberwehnter maßen daruͤber berichtet werden; alles bey Vermeidung gleich vorhergesetzter selbst aͤigener Verantwortung.

Und damit sich desfalß Niemandt seiner unwissenschafft / oder sonst zu entschuͤldigen / auch seinen selbstigen Schaden desto baaß verhuͤten moͤge / so soll ein jeder Buͤrger / und Buͤrgerin / so sich der Maaßen / und Gewicht in ihrer Handtierung gebrauchen wollen / dieselbe Maaß / und Gewicht erst / und ehe das gebraucht wird / durch unseren Meyeren / wie braͤuchlich / aͤichen / stempelen / und justificiren laßen.

44. Von denen Kannengieszeren / und Ihrer Ordnung.

Nachdeme befunden / daß die Kannengießer in Unser Statt Bonn vor dieser Zeit keine sichere Ordnung / und Maaß bey / und mit Verfertigung ihrer Arbeit gehabt / und gleichwohl Ihnen selbst zu Befuͤrderung Ihres Handtwercks / und sonsten Maͤnniglichen / so Ihrer Arbeit gebraucht / und von Ihnen etwas gelten / daran gelegen / daß Ihnen eine sichere Ordnung / darnach sie sich mit Ihrer Arbeit zu richten haben / gegeben werde.

Demnach setzen / ordtnen / und wollen Wir / daß wan sie die Kannengießer hinfuͤro in Unser Statt Bonn wohnen / Buͤrger seynd / und sich Ihres Handwercks daselbst gebrauchen wollen / sich folgender Ordnung / und der Coͤllnisch-Proben bey nachgesetzter Poͤen / und Straff gemaͤß halten sollen.

Erstlich sollen Unsere Buͤrgermeistere / und Rath Unserer Statt Bonn ein Steinerne Form fertigen / darin ein Coͤllnische <74> Probe giessen / mit der Statt Wappen stempelen / und fuͤr / sich selbst halten.

Folgents soll ein jeder Kannengießer sich gleicher gestalt ohngefehrlich eine Form zu bereiten / darnach sollen bemelte Buͤrgermeistere / und Rath / jederem Kannengieser / so viel Zinns von der Coͤlnichen Proben mittheilen / daß ein Jeder dieselbe in sein Form giessen / und fuͤr sich selbst behalten moͤge / damit Er seine Arbeit nach solcher empfangener Proben zu reguliren wisse / und wird diese Probe Cuͤr Zinn genandt.

Item es sollen bemelte Buͤrgermeistere / und Rath alle Proben / so durch sie den Kannengießeren mitgetheilt werden / mit der Statt Wappen {damit sie dieselbe nit faͤlschen / noch veraͤnderen koͤnnen} zeichnen.

Neben deme sollen auch Buͤrgermeistere / und Raht von lauterem unvermischtem reinen feinen Zinn in Ihre vorberuͤrte Form giessen / mit der Statt Wappen / und einer Massen stempelen lassen / und fuͤr sich selbst behalten / und wird diese Probe fein Zinn genandt.

Item / wan durch die in Unserer Statt wohnende Kannengieser Cuͤr Arbeit gemacht wird / soll allen Unser Statt Wappen mit dem Dato darauff geschlagen werden.

Item welche Kannengießer in Unser Statt Bonn die Rose / oder Hammer schlagen wollen / sollen sie solche Zeichen auff kein andere / dan auf feine Arbeit stempelen / deß soll Unser Statt Wappen darunter geschlagen werden / mit dem Dato, wie vorgemelt / damit man wissen moͤge / an welchem Orth solche Arbeit gemacht.

Wann nun solches geschehen / sollen Zwey Probier-Meistere durch unsere Buͤrgermeister / und Rath verordnet / und denenselben befohlen werden / daß sie alle Monat / und so offt ihnen gelegen ist / mit des Raths Proben bey allen Boͤnnischen Kannengießeren umbgehen / und eines jeden Arbeit nach folgender gestalt probiren sollen.

Nemblich daß sie auß der Kannengießer Model etwas geschmoltzen Zinn nehmen / in ihre Form giessen / und mit einer Goldt-Waagen solchen Guß gegen ihre des Raths Proben <75> auffziehen / und dahe selbige zu schwer befunden wuͤrde / soll deren Arbeit fuͤr untaͤuglich / und ohnauffrichtig erkendt werden.

Wofern nun im unbgehen die Probier-Meistere kein geschmoltzen Zinn bey denen Kannengießeren in ihren Schmeltz-Modelen vorhanden fuͤnden / sollen gemelte Probier-Meistere etwas Zinns / so durch das Radt von ihrem der Kannengießer Werck abgedraͤhet / schmeltzen / in des Raths Form giessen / und probiren / gleicher gestalt soll es mit der Proben des feinen Zinns gehalten werden.

Item / so offt die Probier-Meistere ein stuck Wercks fnden / das dieser vorangeregter Proben / und Ordnung nit gemaͤß / sollen sie dasselbig an stundt zerschlagen / und ins Schmeltz-Duppen werffen / und sollen darneben die Kannengießere von jedem stuͤck Wercks / so der Proben nit gemaͤß befunden / Vier Marck zur Bueß geben / darvon beyden Buͤrgermeistere; zur Zeit ein Marck under sich zu theilen / jedem Probier-Meisteren ein Marck / und die vierte Marck denen Hauß-Armen gebuͤhren / und gegeben werden.

Item wan Boͤnnische Arbeit mit der Statt Wappen gestempelt nacher Coͤllen zu verkauffen / oder zu verbeuten bracht wuͤrde / es were fein / oder Cuͤr Probe / und dieselbe sich nit auffrecht befuͤnde / und derenthalben wider zuruck auff Bonn gesandt wuͤrde / soll solche Arbeit durch die Verordnete Probier-Meistere zerschlagen / und von den Meisteren des Wercks / die Bueß / wie vorgemelt / eingefordert / und außgetheilt werden / In Summa / was vorgemelte Kannengießer an fein / und Cuͤr Arbet in ihrem Gatten auff den feilen Kauff machen / haben / und außverkauffen / das soll vorgemelter maßen gestempelt / dieser Ordnung / und der Coͤllnischen Proben gemeß gemacht werden.

Dabey soll aber offtberuͤrten Kannengießeren gestattet / und zugelaßen seyn / wan / und zu welcher Zeit ihnen den Kannengießeren durch In- und Außwendige einige alte Arbeit zerbrochen / oder zerschmoltzen Zinn widerumb auffs Newe zu vermachen zubracht wuͤrde / und dasselb nit auff die Proben / sonderen allermassen / wie sie ihnen dasselbe zubracht / ohne einig Auffgeldt vermacht haben wolten / daß sie ihnen solches umb gebuͤrliche Belohnung machen moͤgen / deß soll der Statt Wappen nicht / [T2] <76> sonderen des Meisters / und deren Partheyen Zeichen / und Mirck darauff geschlagen werden.

45. Von den Wirths-Häuseren / und Herbergen / und wie sich die Wirth / und Wein-Schencke auff Sontäg / und Heyl: Täge / und sonst zu verhalten.

Nachdeme die Taͤgliche Erfahrung gibt / daß zu Zeiten viel unehrbare Handlungen / und allerley Unrath durch Unordnung der Wirthshaͤuser / und Herbergen sich zutragen / und verursacht werden.

So ordnen / und wollen Wir / daß kein Wirth / so jetzo in unser Statt Bonn Herberg / oder Wirthschafft haltet / oder kuͤnfftiglich halten wuͤrde / wissentlich keine boͤse / noch ohnehrbare Gesellschafften / ohnehrlich Weesen / Gezanck / Gotts-Laͤsterung / oder Verdaͤchtige Persohnen in seinem Hauß gestatten / auffhalten / oder herbergen solle / sonderen dahe die Wirthe vermercken wuͤrden / daß bey ihnen dergleichen Persohnen ankommen / oder in ihren Haͤuseren einige heimbliche Practiquen, oder Anschlaͤge gemacht wuͤrden / solches ohn allen Verzug bey verwirckung der Wirthschafft / oder sonst hoher straff / Unserem Ambtman / Vogt / oder ihres abwesens Buͤrgermeister / und Rath anzeigen / und vermelden / ebenfalß sollen auch die Wirth in ihren Haͤuseren keine ohnerbare Kaͤuff / noch Vertraͤge gestatten / sonderen / wan sie das etwa erfahren / gleicher gestalt wie oben / anzeigen.

Es sollen auch die Wirth einem Jeden / so zu Ihnen zur Herberg einkehrt / auffrichtige Maaß / gute Speiß / und Tranck umb seinen Pfenning reichen / und wohe einige Speiß verduͤrbe / oder sie die Wirth darmit betrogen weren / dieselbige sollen sie Niemandt versetzen / sonderen den Leuthen / sie seyen reich / oder arm / nach ihrem vermoͤgen gut Gericht thuen.

Und soll hinfuͤhro keiner auffs new anfangen Wirthschafft zu treiben / und zu dem Endt sein Schildt außhangen / Er habe <77> dan solches zuvor Unseren Buͤrgermeisteren / und Rath angezeigt / und sich dieser Unser Ordnung / wie Er sich in seiner Wirthschafft zu verhalten / durchauß genugsamb berichten laßen.

Zudem ordnen / und wollen Wir hiemit ernstlich / daß hinfuͤhro vor geendigter Predig / und Ambt der Heyl: Meeß uͤberall kein Gelager / noch Jemanden Wein gezapfft werde / dan allen fuͤr den Außwendigen Wandelsman / und die Krancken / und so Jemandt dargegen thuen wuͤrde / Der / oder Dieselbe Wirth / und Gaͤste sollen das Erstemahl / Ein Jeder auff einen Goldtguͤlden zu erlegen / und wohe sich zum Zweiten / oder Drittenmahl daruͤber fuͤnden / nach ihrem vermoͤgen darumb gebruͤchtet / und gestrafft werden / Zu welchem Endt dan die Zwey Zeitliche Buͤrgermeistere / nun und dan / ohnvermerckt in sothane Wirths-Haͤußere Kundtschafften außzuschicken / und dardurch die Ehre Gottes, absonderlich zu eyfferen hetten.

Gleicher gestalt soll auch auff den Sonn- und anderen Feyer-Taͤgen in Unser Statt Bonn kein Kraͤmerey / Kauffen / und Verkauffen / vor Ende der Predig / und anderem Christlichen Gotts-Dienst gehalten / und gebraucht werden / bey Verlust des jeinigen / so binnen der Zeit auffgethan / und verkaufft werde / dasselbe under die Hauß-Armen außzutheilen / doch mag man Fleisch / Brodt / und andere Nothwendigkeit / und Essen-Speiß vor der Predig / und anderen Kirchen-Dienst in der Fleisch-Hallen / und sonst ein Jeder in senem Hauß verkauffen / und aber under der Predig / und wehrendem Gottes-Dienst sich dessen enthalten.

Es soll auch keinem under der Predig / und anderen Gottes-Diensten am Vormittag auff dem Marck / und am Rhein auff dem Werff / oder sonst einigem anderen Orth mit ohnnuͤtzen Geschwaͤtz zu gehen / zu wandelen / und von ihrem aͤusserlichen Anligen zu reden / oder zu traktiren gestattet werden / bey Straff / und Bueß / 12 Albus / darauff unsere Statt-Dienere / und Gerichts-Botten fleißiges Auffsehen haben sollen / und darvon den Dritten Pfenning fuͤr ihr Anbringen geniessen / die uͤbrige Zwey Theil sollen halb Beyden Buͤrgermeisteren zur Zeit / und halb denen Hauß-Armen verfallen.

So ordnen Wir auch / und befehlen / daß hinfuͤhro des Sommers zu Acht: und des Winters zu Sieben Uhren des Abendts nit allein alle Gelacher gerechnet / sonderen auch [V] <78> auff- und auß seyn sollen / und dahe daruͤber Jemandt betroffen wuͤrde / soll ein Jeder Gelachs-Man / so offt es geschehe / auff einen Guͤlden Current / und der Wirth auff Zwey derselbigen Guͤlden ohnnachlaͤßig der Statt zum Baw zu erlegen / gestrafft werden / doch sollen die Frembde / so des Nachts verbleiben / und sonst mit den Wirthen wissentlicher Ehrlicher Handlung halber zu thuen haben / und also mit ihrem guten Willen bey ihnen seint / hierinfalß außgenohmen seyn.

Damit diese Unsere Ordnung desto starcker gehalten werde / so soll Einer von den Buͤrgermeisteren zur Zeit / oder Sie Beyde / so offt ihnen gefaͤllig / mit ihren Dieneren umbgehen / oder auch ihre Dienere / wan es ihnen den Buͤrgermeisteren ohngelegen / umbschicken / und die Wirths-Haͤuser / Marck / und Gassen besuchen / oder besuchen laßen / und die straffbahre auß den Wirths-Haͤuseren / vom Marck / Werff / Gassen / und Strassen zur Kirchen treiben / auch alßbaldt auff den negstfolgenden Raths-Tag zu richtigmachung der verwirckter Straff / und Bueß vorbescheiden werden.

Neben diesem setzen / und ordnen Wir / wan kuͤnfftiger Zeit bey den Wirthen in Unser Statt Bonn einig Außwendig Frembde Gaͤste / Kriegsmaͤnn / oder andere / so dieser Ohrt ohnbekandt / zur Herberg eimkehren wuͤrden / daß alßdan solches der Wirth alßbaldt Unserem Ambtnan / und Vogt / oder denen Regierenden Buͤrgermeisteren anzeigt / und zu erkennen geben / und den / oder dieselbe Gaͤste / ohne Befelch / und fernere Erlaubnus Unseres Ambtmans / Vogts / oder Buͤrgermeisteren uͤber eine Nacht nit haußen / oder beherbergen / und sonst aller Frembder Gaͤsten Nahmen / und Zunahmen alle Abendts auffschreiben / und Unserem Ambtman / Vogt / oder Buͤrgermeisteren zustellen sollen / wie vorgemelt.

Diesem allem nach / dieweil vergeblich were / gute Policey / und Ordnung zu machen / und auffzurichten / wan Dieselbe nit der Gebuͤhr solle gehalten / vollnzogen / und gehandthabt werden.

So gebieten Wir Unserem Ambtman / Vogt / fort Buͤrgermeisteren / Rath / und Zwoͤlffteren / Gaffelen / oder Zunfften / und Gemeiner Buͤrgerschafft in Unser Statt Bonn / so jetzo daselbst seynt / oder kuͤnfftig dahin kommen / und angenohmen <79> werden moͤgen / diese Unsere vorgesetzte Reformation, und Ordnung / soviel Dieselbe eines Jeden Person / Ambt / und Befelch belangen moͤchte / in allen Ihren Puncten / Articulen / und Stuͤcken / steet / faͤst / und ohnverbruͤchlich / bey Straff dann einverleibt / auch vermeidung Unserer Ungnaden / zu halten / zu handthaben / und wuͤrcklich zu vollnziehen / auch dargegen nichts vorzunehmen / noch zu gestatten.

Dan Wir wollen die Jenige / so darwider handlen / und diese Ordnung uͤberschreiten / darin straffmeßig / oder saͤumig befunden werden / in Unser derentwegen verordneter Visitation, durch Unsere anjetzo specialiter Committirte; nach geendigter dieser Commission aber obgemelter massen in perpetuum verordnete Commissarien / unseren Zeitlichen Ambtman allhier / und beyde aͤlteste Hoff- und Hoff-Cammer-Raͤthe zu Red stellen laßen / und nach befindung der Sachen die Straffen zu schaͤrffen / auch dieser Unser Ordnung / so dick / und offt solches die Notturfft erfordert / ab- und zu zu thuen / dieselbe zu erkleren / und zu besseren Uns vorbehalten haben / damit auch die Straffen / und Poͤen faͤlle dem gemeinen Weesen zum besten ersprießen / und angedeyen moͤgen / So ordnen / und wollen Wir / daß dieselbe vom Zeitlichen Statt-Schreiberen mit Tag / und Dato verzeichnet / und prothocollirt werden / auff daß Unsere Commissarii, nebst anderen / auch diesem nachsehen moͤgen / damit nicht sothane Geldere / dieser Ordnung zuwider / zum Privat Nutzen verschlagen: sonderen Unserer Gemein-Nuͤtziger gnaͤdigster Intention zu folge zum Publico an- und verwendt werden koͤnnen.

Urkund Unseres Handt-Zeichens / und auffgetruͤckten Insiegels / geben in Unserer Churfuͤrstl: Residentz-Statt Bonn / den Fuͤnffzehnten Tag Monats Decembris, Anno 1698.

Joseph Clement Churfuͤrst

<80>

46. Index